Samartín prepara una edición nueva del certame gastronómicu n’asturianu dedicáu a los pinchos

Un total de 24 establecimientos de Sotrondio, Blimea y L’Entregu participen esta fin de selmana en ‘Samartín del Pinchu’. Esti concursu de tapes y pinchos ye ún de los pocos certámenes gastronómicos qu’usen l’asturianu dafechu.

Vecinos de Samartín del Rei Aurelio y visitantes van poder disfrutar de creaciones culinaries del vienres al domingu pol preciu de dos euros y van ser los encargaos, colos sos votos, de decidir cuál ye’l meyor pinchu de los 24 presentaos al concursu. Pa ello, repartiránse 2.000 papeletes qu’han d’introducise nes urnes habilitaes pola organización nos chigres participantes, y que tamién servirán pa entrar nun sortéu de 100 euros pa gastar nos establecimientos asociaos al coleutivu Empresarios y Comerciantes de Samartín del Rei Aurelio (ECOSAM), organizador de ‘Samarín del Pinchu’ col sofitu del Conceyu de Samartín del Rei Aurelio y DISCEAS, patrocinador d’un eventu yá consolidáu, como amuesa la inscripción d’ocho bares más en comparanza cola edición pasada. Pa poder exercer la votación, los veceros han de prebar al menos cuatro pinchos.

Como n’años anteriores, y como asocede nel so concursu hermanu ‘Samartín de les tortielles’, que tien llugar en marzu, la organización propón dos rutes pa nun perdese nengún pinchu, una per Sotrondio y Blimea, y otra per L’Entregu. La primera entama nel Mesón La Cabaña (Brocheta ibérica y de la güerta con bolines de quesu cruxente) y continúa per Espacio Gourmet Palermo (Pataques rellenes a la mio manera), Les Carboneres (Emparedáu cruxente de hombrín y anchoa con salsa Tártara), Casa Josefina (Fayuelu d’anchoa con llazu de xamón), Sidrería Crespo’s (Chipirones rellenos encebollaos), Sidrería San Mamés (Otru rollu diferente de presa ibérica), Café Peña Mayor (Brocheta Peña Mayor), Café El Secañu (Bombones de mar) y termina nel Café El Cascayu (Albóndigues caseres al tomate natural y patates panaderes).

Mentes la ruta entreguina ye la siguiente: Bar La Güestia (Bacaláu al pistu la casa), Sidrería El Semáforo (Bocáu de güerta ibérica), El Ocho de Chapó (Delicia de monte asturianu), Sidrería La Tená (Pastel de carnes gratináu), Sidrería Mejuto (Coyonudu),  Sidrería El Puente (Pinchu El Puente), Sidrería La Laguna del Rio III (Quiché de trigueros en salsa afuega’l pitu), Sidrería El Zamorano (Cebolla ibérica), Vinoteca Domoe (Xabalí gobernáu con patatinos y boletus), Casa del Pueblo (Hoxaldre de bacaláu al pistu), Sidrería La Conda (Tosta de sollombu con xampiñones y cebolla caramelizada), La Bodeguina de Úrsula (Rollu de Sarmale), Espacio Gourmet Cervantes (Callos de bacaláu con güevín de codorniz), Café El Castañéu (Tosta dulce de mar y tierra) y  Restaurante El Urogallo (Montadín de pataca y picadiellu con quesu Vidiagu). Otra manera, ECOSAM va repartir 2.000 gastromapes pa que vecinos y visitantes conozcan les tapes ufiertaes en cada llugar, asina como la so situación, y puedan establecer la so propia ruta.

‘Samartín del Pinchu’ ye ún de los pocos certámentes gastronómicos que se celebren n’Asturies qu’utilicen l’asturianu dafechu, como pue comprobase nos nomes de les creaciones presentaes a concursu, na cartelería y nos gastromapes. Hai que destacar qu’ECOSAM cuenta col asesoramientu de la Oficina de Política Llingüística de Samartín del Rei Aurelio nesti concursu.