Samartín homenaxea a les muyeres cantantes de tonada del conceyu

El Conceyu de Samartín del Rei Aurelio celebró esti vienres un homenaxe a les muyeres cantantes de tonada del conceyu. L’alcalde, Enrique Fernández, reconoció l’aportación d’estes artistes a la cultura asturiana.
 
Diez muyeres, moces y mayores, foron recibíes por Fernández y Gema Suárez, conceyala de Cultura na Casa Conceyu: Diagmina Noval Antuña, María Luisa Díaz Ordóñez, Blanca Cobo Quiroga, Pilar Barreñada Montes, Orfelina Alonso González, Rosi Fernández Torre, Noelia de Dios Fernández, Vitalina Piloñeta García, Leontina Iglesia y Blanca Carballo, a les qu’hai que sumar a Bibiana Sánchez, Emi Fanjul y Ana María Díaz López, que nun pudieron asistir al eventu. Toes son nacíes o residentes en Samartín del Rei Aurelio, dalgunes n’activu y otres con una importante trayeutoria detrás.
 
“L’homenaxe foi un actu de reconocimientu público de l’aportación de les intérpretes de tonada asturiana a la cultura que se xesta” n’Asturies y “una distinción a la contribución d’estes muyeres del conceyu pa mantener viva la canción asturiana y favorecer el trespasu xeneracional d’esti legáu artísticu”, espliquen dende’l Conceyu. Fernández tuvo unes pallabres d’especial cariñu pa con Diagmina Noval pol so papel importantísimu na formación de cantantes nueves.
 
Esti xestu del Conceyu de Samartín del Rei Aurelio tien llugar nos díes previos al XXI Día de la Canción Asturiana que va celebrase’l miércoles nel Teatru Municipal de L’Entregu. Pilar Barreñada (Blimea), Begoña Aranguren (Mieres), Laudelina Hortal (Amieva), Manuel López (Cangas del Narcea), Damián Blanco (Blimea), Graciano Fernández (L’Entregu) y Jeremías Cuello (La Madalena) tienen confirmada la so presencia nesta actividá entamada pola Asociación de la Canción y el Folklore del Valle del Nalón, cola collaboración del Ayuntamientu, que va principiar a les 18 hores.