Samartín del Rei Aurelio avera la llingua y cultura asturiana a discapacitaos inteleutuales

Trece persones con discapacidá inteleutual tienen dende esti llunes la oportunidá d’averase a la llingua y cultura asturiana gracies a un taller entamáu pol Conceyu de Samartín del Rei Aurelio. El cursu va allargase hasta’l mes de payares.
 
A esta iniciativa de la conceyalía de Cultura, al traviés de la Oficina de Normalización Llingüística, na que collabora l’Academia de la Llingua Asturiana (ALLA), sumáronse trece alumnos con edaes comprendíes ente los 22 y 40 años de los centros ocupacionales Rei Aurelio y Pando. Este persones, con discapacidá inteleutual, van poder conocer un poco meyor la so llingua materna con un cursu de nociones básiques d’asturianu onde va trabayase, sobre manera, el vocabulariu al traviés de materiales sencillos y mui visuales. En total son 12 sesiones que dieron aniciu ayeri y que van celebrase los llunes y los vienres nel Centru de Día de l’Asociación Rei Aurelio, en L’Entregu.
 
Según esplicó ayeri la edil de Cultura, Gema Suárez, na apertura del cursu, el Conceyu de Samartín entama esta iniciativa novedosa col envís de “facilitar l’accesu a la cultura asturiana a les persones con discapacidá, porque l’accesibilidá universal pasa non sólo por eliminar barreres arquitectóniques, sinón tamién por superar otres trabes que puedan xenerar discriminación, y nesti sen, dende les alministraciones debemos facilitar l’accesu a les teunoloxíes, los equipos, los bienes y productos, la participación, la utilización de los recursos o la educación” a estes persones. D’igual forma, la conceyala recordó qu’esti cursu d’asturianu “forma parte de la programación d’actividaes que se desendolquen dende la Oficina Llingüística, na Casona del Bravial, dende la que se trabaya pa normalizar l’usu del asturianu nes comunicaciones interpersonales y coles alministraciones y algamar que tea presente nel mesmu nivel que’l castellanu nel mayor númberu posible d’ámbitos: alministración, educación, lliteratura, toponimia, teunoloxíes, etc.”.
 
Xunto a Suárez, tuvieron presentes na inauguración d’esti taller d’asturianu Pablo Xuan Manzano, en representación de l’ALLA; les direutores de los centros ocupacionales Rei Aurelio y Pando, Milagros Novo y Nieves Mejuto, de manera respeutiva; y el responsable de la Oficina de Normalización Llingüística de Samartín del Rei Aurelio, Hugo Cortina.