Samartín acondiciona l’accesu al dolmen de la campa L’Españal

El Conceyu de Samartín del Rei Aurelio pretende facilitar l’accesu al dolmen de la campa L’Españal pa potenciar esti monumentu prehistóricu. De momento acondicionóse l’entornu y va procedese a ameyorar la señalización.

“L’oxetivu d’esta actuación pasa por poner en valor el patrimoniu arqueolóxicu del municipiu, que na citada campa concrétase nun dolmen megalíticu milenariu, como enantes se fixera con otros llugares y bienes patrimoniales que resulten reclamos atractivos pa los turistes, al tiempu qu’exercen d’elementos dinamizadores de la economía”, señalen dende’l consistoriu. El primer pasu foi la llimpieza y l’esbroce de la zona, a lo que va siguir una meyora de la señalización pa dar con esti monumentu asitiáu nel cordal que separta Samartín con Bimenes.

En concreto, l’accesu al dolmen de la campa L’Españal pue facese a pie o en coche touterrén dende La Casilla (Blimea) o La Campeta (Sotrondio). Una vegada enriba, los visitantes van poder presenciar esti monumentu desconocíu pa munchos asturianos y una vista perguapa de Peña Mea, Penubina y L’Aramo.