Salú tien en siguimientu a más de 60 persones polos positivos últimos de COVID-19

El modelu de detección de los casos de COVID-19 n’Asturies ye quien a identificar a los contautos estrechos de los positivos en 24 hores, según confirma la Conseyería de Salú. Los últimos casos rexistraos estos díes atrás faen qu’anguaño haya más de 60 persones en siguimientu pa controlar la tresmisión.

A diferencia de lo qu’asocede n’otres autonomíes, el sistema de detección que funciona n’Asturies implica a los centros de salú, onde los más de 2.500 profesionales de la rede d’Atención Primaria participen de manera activa na identificación de casos positivos, amás de caltener el siguimientud e los confirmaos activos. Énte una sospecha de COVID-19, solícitase una prueba PCR y faise un primer análisis preliminar de posibles contautos estrechos.

El Sistema de Vixilancia de Contautos Estrechos ta formáu por 37 persones, toes elles personal sanitariu, que faen un estudiu más fondu: busquen la fonte d’infeición del casu y efeutúen el siguimientu de los contautos estrechos, a los que se-yos somete a cuarentena domiciliaria. En concreto, hai 32 profesionales de Medicina y 2 d’Enfermería, amás d’un grupu encargáu especialmente de la vixilancia y intervención en centros sociosanitarios residenciales, compuestu por 2 médicos y una enfermera.

D’igual forma, al igual qu’asocede cola Atención Primaria, los responsables asistenciales de los 240 centros de persones mayores y 18 centros de persones con discapacidá encárguense de la identificación temprana de casos posibles ente residentes y trabayadores, asina como de la comunicación de casos sospechosos a les autoridaes sanitaries. Esta rede texida dende’l Sistema de Vixilancia de Contautos Estrechos ye quien a detectar tolos contautos estrechos de los positivos en 24 hores, según confirma la conseyería, siendo la media de 8,6 persones por cada afectáu por COVID-19.

Anguaño hai en siguimientu unes 60 persones, a los qu’hai que sumar los últimos de Zaragoza y República Dominicana y ún nuevu confirmáu güei procedente d’Aragón que va facer aumentar la cifra. Amás la conseyería entama entrevistes y controla a aquelles personas que tuvieron contautu estrechu con casos confirmaos d’otres autonomíes o que coincidieron nel mesmo mediu de tresporte públicu.