Salú retira un positivu de la serie por un casu duplicáu del 11 de mayu

La cifra de contaxos queda en 2.424.

Asturies suma la so cuarta xornada siguida ensin rexistrar nin un positivu por COVID-19. Ayeri procesáronse 2.425 muestres por PCR, que se sumen a les 3.380 feches nos trés díes previos.

Sicasí, la serie rexistra güei un contaxu menos que nos datos proporcionaos ayeri. La Conseyería de Salú esplica que ye por un duplicáu del 11 de mayu que s'elimina.

Un fináu

Na xornada, por contra, hai que lllamentar una muerte más, que dexa'l total de perdes en 323. Na UCI siguen 9 persones y 26 en planta, mentes que curaron 23 que faen ascender el númberu d'altes epidemiolóxiques, tanto domiciliares como hospitalaries, a 1.775.