Salú refuerza l'equipu de rastrexadores llueu d'un pequeñu aumentu de casos de COVID-19

Pasen de 17 a 22 diarios de media na selmana última. Los mayores de 70 años van recibir la tercer dosis a partir del 2 de payares, cuando entama la vacunación contra'l gripe.

Sigue la tendencia ascendente de la pandemia, anque entá en cantidaes mui baxes. Sicasí, la Conseyería de Salú decidió reforzar el so equipu de ratrexadores.

"Ésti ye un sistema flexible, polo que si baxa la incidencia baxa'l rastrexu, pero si xube la incidencia aumenta'l rastrexu pa siguir poniendo límites a la espansión del virus", esplica María José Villanueva, coordinadora de Programes COVID. Na selmana última rexistráronse 154 casos nuevos de COVID-19 polos 118 de la anterior, lo que supón una media de 22 contaxos diarios.

Dende l'entamu de la cuarta fola la evolución d'esti datu foi la siguiente: 51, 57, 196, 448, 493, 423, 289, 194, 133, 77, 60, 42, 20, 12, 13, 11, 13 y 17, hasta los 22 actuales. La incidencia acumulada a 14 díes ta agora con 26,7 casos cada 100.000 habitantes, polo qu'Asturies abandona'l nivel de 'normalidá nueva' al superar la llende de 25 el sábadu pasáu y pasa a riesgu baxu.

Seis finaos

Estos díes hebo que llamentar la muerte de 6 persones finaes cola enfermedá causada pol coronavirus SARS-CoV-2. El total de finaos nel andanciu algama la cifra de 2.079.

Na medianueche había 34 pacientes hospitalizaos con confirmación o sospecha de COVID-19, de los que 28 tán en planta, 2 más que'l domingu pasáu, y 6 na UCI, 1 menos. La tasa de positividá a 7 díes ye del 1,76 por cientu, cuando na actualización última quedara nel 1,26 por cientu.

Entama la citación

El Serviciu de Salú del Principáu d'Asturies (SESPA) entamó cola citación a la población de riesgu pa l'alministración de la vacuna del gripe, que va principiar el martes 2 de payares. Al igual que l'añu pasáu, nun ye necesario llamar a la centru sanitariu p'acceder a ella, yá que los ciudadanos a la que va dirixida la campaña van recibir una comunicación nel momentu que sía'l so turnu.

Les persones de 65 a 69 años únicamente van recibir nos puntos de vacunación masiva la profilaxis antigripal, mientres que pa los mayores de 70 ésta va dir acompaña pola tercera dosis contra la COVID-19, a esceición de los pacientes del área sanitaria IV, con cabecera n'Uviéu, onde va repartise ente l'HUCA o'l Monte Naranco y los centros de salú. El xefe de Vixilancia Epidemiolóxica, Ismael Huerta, y el xefe de Xestión Asistencial del SESPA, Óscar Suárez, presentaron esta tarde l'operativu de la campaña 2021-2022, rescamplando'l primeru la importancia de la inmunización d'enfermos crónicos, mayores, persones inmunodeprimíes y embarazaes “porque la coinfeición del gripe cola COVID duplica'l riesgu de muerte na población vulnerable”.

Na semeya, Suárez y Huerta.