Salú propón acutar les franxes de 9 a 12 y de 15 a 18 hores pa los mayores de 65 años y coleutivos vulnerables

El Gobiernu insiste a la población, énte la negativa de Madrid pal establecimientu d’un confinamientu domiciliariu de 15 díes pa frenar l’espardimientu del coronavirus y evitar el colapsu sanitariu, en que s’autoconfinen. Propón acutar les franxes de 9 a 12 y de 15 a 18 hores pa coleutivos vulnerables y mayores de 65 años.

Rafael Cofiño, direutor xeneral de Salú Pública, entiende necesariu que la ciudadanía pueda “facer actividá física al aire llibre y paseos”. Nesti contestu cada persona podría dedicar dos hores diaries pa ello, de manera individual o acompañada de convivientes.

Les franxes propuestes van de 9 a 12 y de 15 a 18 hores pa los mayores de 65 años, dependientes o individuos con patoloxíes de riesgu. Mentes, quedaría n'eclusividá pal restu de la población los tramos que van de 6 a 9 y de 18 a 22 hores, con toque de queda entes les 22 y les 6 hores.

D’igual forma, encamiéntase a la ciudadanía a que faiga un confinamientu domiciliariu voluntariu hasta’l día 18 cola intención de llendar l’actividá, la movilidá y la interacción social pa frenar los contaxos de coronavirus. Amás encamienta a la población a intensificar les midíes de proteición por mor del incrementu de la presión asistencial hospitalaria, sobre manera, de les UCI, y el pasu del país al nivel d’alerta 4.

Sigue’l zarru perimetral de Xixón, Uviéu y Avilés

L’Executivu decidió tamién ampliar el zarru perimetral de Xixón, Uviéu y Avilés, que’l sábadu cumple dos selmanes. Los ciudadanos nun pueden entrar nin salir d’estos conceyos hasta’l 18 de payares.