Salú propón a la ciudadanía’l plan ‘Constrúi la to burbuya social’ y prepara alertes naranxes nueves

Caltener la salú mental de los asturianos y frenar l’espardimientu del coronavirus SARS-CoV-2 ye l’oxetivu de la campaña ‘Constrúi la to burbuya social’ de la Conseyería de Salú, que ta acompañada por un videu en castellanu. Rafael Cofiño, direutor xeneral de Salú Pública, confirmó la declaración d’alertes naranxes nueves.

“Tomaremos como referencia’l númberu 6 y pensaremos en 5 persones coles que mantienes rellaciones cercanes y importantes pal to bienestar, coles que nun mantienes la distancia de seguranza nin lleves mázcara”, principió Nadia García Alas, téunicu del Serviciu de Salú Poblacional. “Eses 6 persones seréis la burbuya social y podréis rellacionavos manteniendo les midíes de seguranza de forma un poco menos estricta, con confianza, cercanía y proximidá”.

Esta midida que se pretende treslladar a la ciudadanía básase nel compromisu de tolos miembros de cada burbuya de respetala y nun compartir otres. “Fuera d’esa burbuya hai que preauticar rigurosamente’l distanciamientu físicu y les midíes de proteición”, polo que los alcuentros con otres persones seríen “en condiciones de seguranza, priorizando l’aire llibre, usando la mázcara de manera correuta, calteniendo la distancia, llavándote les manes frecuentemente, etc”, añadió García Alas enantes de qu'Elena María Fernández, del coleutivu Ye too Ponese, diera trés exemplos de burbuyes, "que pueden ser mui diverses; caún tien qu'atopar el so formatu", pudiendo superar la cantidá de 6 persones según les circunstancies.

Cofiño, treslladó pela so parte’l so esmolecimientu pol aumentu de casos de COVID-19 nel país y anunció qu’a lo llargo del día van decretase alertes naranxes nueves. Anguaño tán nesti estáu Llaviana, Samartín del Rei Aurelio, Llangréu, Xixón y Ponga.

Na semeya, Fernández, Cofiño y García Alas.