Salú notifica once nuevos positivos por coronavirus

El Serviciu de Vixilancia Epidemiolóxica de la Conseyería de Salú avisó güei al Ministerio de Sanidad once nuevos casos positivos de coronavirus, seis d'ellos rellacionaos colos biltos declaraos en Cangas y nun bar de Xixón.

El focu detectáu n'El Chiringuito del Pela, en Courias, incorpora dos nuevos casos nes postreres 24 hores, polo que'l númberu total de persones afectaes llega a 15. Coles mesmes, otros cuatro infectaos tán venceyaos al biltu declaráu nel bar La buena Vida de Xixón, que suma hasta agora 32 contaxos.

A estos seis positivos súmase otru procedente d'Andalucía y unu más que ye contactu estrechu d'un casu detectáu enantes.

Amás, detectáronse trés contaxos que tán n'estudiu para determinar el so venceyu epidemiolóxicu.

Toles persones infectaes presenten síntomes leves y tán n'aislamientu nes sos cases.

Per otra parte, el Serviciu de Salú del Principáu (Sespa) decidió retirar el puntu de autocovid de Llanes, instaláu tres el llamamientu pal estudiu ampliáu del biltu nel conceyu, ya que la solicitú de pruebes amenorgóse considerablemente. D'equí p'arriba, va citar a les persones que precisen una PCR, una vegada rellenáu'l correspondiente formulariu, para practica-yos el test.