Salú informa d'una decena de casos nuevos detectaos esti martes

Ye la cantidá más baxa rexistrada dende'l 3 d'agostu del añu pasáu, cuando hubo 6.

La Conseyería de Salú comunicó la detección de 10 casos nuevos ayeri –los datos oficiales sumen 2 más por positivos non contabilizaos en díes anteriores–. Una cifra que sigue la tendencia descendente de la pandemia n'Asturies –el llunes comunicáronse 15 contaxos– llueu de pasar la cuarta fola.

Fixéronse 2.184 pruebes de diagnósticu d'infeición activa na xornada, polo que la tasa de positividá s'asitió nel 0,91 por cientu. A 7 díes, esti porcentaxe ye del 1,8 por cientu.

Nun hebo finaos ayeri, polo que'l total de persones que perdieron la vida nel andanciu caltiénse en 2.063. Siguen ingresaos na UCI 13 pacientes, mentes que 36 tán en planta con confirmación o sospecha de COVID-19, 8 menos que'l llunes.

Na semeya, vacunación a lo primero del mes na Plaza Mayor de Xixón.