Salú informa de 35 casos nuevos de COVID-19

|
Zona d'espera vacunación n'El Molinón añu 1.981

La tasa de positividá diaria asitióse nun 1,76 por cientu nuna xornada na qu'hebo que llamentar la muerte d'un home de 75 años.

A falta de la espublización de los datos oficiales de la COVID-19, la Conseyería de Salú comunicó la detección de 35 casos nuevos ayeri –l'actualización restó 2 a la serie por duplicaos en díes anteriores, poniendo'l total en 53.250–. Son 13 menos que'l martes, cuando s'informó de 48.

Fixéronse 2.561 pruebes de diagnósticu d'infeición activa, polo que la tasa de positividá quedó nun 1,76 por cientu pol 2,30 por cientu de la xornada anterior, cuando se realizaron 2.741. A 7 díes, esti porcentaxe taba enantes de l'actualización de los datos nun 2,77 por cientu –ayeri baxó al 2,71 por cientu–.

Un home de 75 años finó cola enfermedá causada pol coronavirus SARS-CoV-2, la sesta del mes y la 1.976 del andanciu. Hai 55 pacientes hospitalizaos con confirmación o sospecha de COVID-19, a lo qu'hai sumar otros 18 que tán na UCI, 5 y 3 menos que'l martes, de manera respeutiva.

16 biltos activos

Asturies informó a Sanidá de la esistencia de 16 biltos activos, mesma cantidá que la selmana pasada, con un total de 139 casos. 5 d'ellos detectáronse estos 7 díes últimos, comunica la conseyería.

Na semeya, ciudadanos esperen na grada norte d'El Molinón depués de recibir la vacuna.

Contador Estadistiques