Salú informa de 12 positivos esti llunes

Algámase la sesta xornada siguida ensin finaos.

Ayeri rexistráronse 12 casos nuevos, 2 menos que'l domingu, cuando la Conseyería de Salú comunicó 14. Fixéronse 1.848 pruebes de diagnósticu d'infeición activa, polo que la tasa de positividá s'asitió nel 0,97 por cientu, siendo esti porcentaxe a 7 díes del 1,03 por cientu.

Hai 17 pacientes hospitalizaos en planta con confirmación o sospecha de COVID-19, 2 menos que'l domingu, y otros 11 tán ingresaos na UCI, 1 menos. El total de finaos sigue en 2.068 llueu de sumar seis xornaes ensin muertes cola enfermedá causada pol coronavirus SARS-CoV-2.

Na semeya, un estudiante de la Universidá d'Uviéu recibe una dosis nel puntu de vacunación móvil instaláu'l vienres nel campus d'El Milán.