Salú informa de 118 contaxos el llunes, con una tasa de positividá del 6,10 por cientu

Hai que llamentar la muerte de dos persones, una muyer de 86 años y un home de 83.

A falta de la espublización de los datos oficiales de la COVID-19, la Conseyería de Salú comunicó 118 casos nuevos ayeri –l'actualización incopora ún más non contabilizáu del domingu que pon el total acumuláu en 48.771–. Son 17 más que la xornada anterior, cuando se rexistraron 101.

El Serviciu de Salú del Principáu d'Asturies fixo 2.836 pruebes de de diagnósticu d'infeición activa, polo que la tasa de positividá s'asitió nel 6,10 por cientu, superior tamién a la del día anterior, cuando quedó nun 5,75 por cientu con 2.120 tests fechos. A 7 díes esti porcentaxa taba'l domingu nel 4,65 por cientu –ayeri aumentó al 4,88 por cientu–.

Dos asturianos finaron ayeri cola cola enfermedá causada pol coronavirus SARS-CoV-2. Dende qu'entamo l'andanciu yá s'acumulen 1.926 muertes –incorpórase una más non contabilizada en díes anteriores–.

174 pacientes tán hospitalizaos con confirmación o sospecha de COVID-19, 5 menos que'l domingu. A ellos hai que sumar 68 ingresaos na UCI, 1 más que'l día anterior.

Medra de casos ente la mocedá

La ocupación total por esta enfermerdá nos hospitales asturianos algama'l 6,91 por cientu, que nel casu de cames UCI, aumenta hasta'l 20,86 por cientu. Otra manera, la Conseyería de Salú alvierte d'una medría de casos ente mozos de 15 a 25 años nes selmanes últimes, que ye de más d'un 90 por cientu na incidencia acumulada a 14 díes nesti grupu d'edá y, a 7 díes, del 98 por cientu.

Na semeya, el polideportivu de Castrillón, onde taben llamaos güei a vacunase 228 mayores de 70 años.