Salú comunica 99 contaxos el martes nuna xornada ensin finaos

La tasa de positividá diaria quedó nun 3,93 por cientu con 3.078 pruebes feches.

A falta de la espublización de los datos oficiales de la COVID-19, la Conseyería de Salú comunicó 99 casos nuevos ayeri –l'actualización rebaxa esta cantidá en 2 contaxos por duplicaos de díes anteriores–. Son 16 más que'l llunes, anque la tasa de positividá ye menor.

Con 3.078 pruebes de diagnósticu d'infeición activa feches, quedó nun 3,93 por cientu pol 4,46 por cientu del día anterior. A 7 díes, esti porcentaxe yera enantes de l'actualización del 5,4 por cientu –ayeri baxó al 5,22 por cientu–.

Nun hebo que llamentar muertes na xornada, polo que'l total de finaos nel andanciu sigue en 1.945. Hai 157 pacientes hospitalizaos con confirmación o sospecha de COVID-19, a los qu'hai que sumar 60 que tán na UCI, 7 y 1 menos que'l llunes, de manera respeutiva.

Na semeya, un home del tramu d'edá de 60 a 65 años recibe la vacuna Vaxzevria d'AstraZeneca'l vienres nel Hospital Central Universitariu d'Uviéu (HUCA).