Salú comunica 259 contaxos, con una tasa de positividá del 5,95

Tres el picu del martes, los datos de la COVID-19 tornen a estabilizase. Na xornada hai que llamentar la muerte de 23 persones.

La Conseyería de Salú comunicó 259 casos nuevos de la enfermedá causada pol coronavirus SARS-CoV-2 –260 nos datos oficiales al incorporar ún de díes anteriores non contabilizáu–. Son 140 menos que'l día anterior, averándose a les cifres del llunes, cuando se rexistraron 221, con una tasa de positividá del 6,31 por cientu.

El miércoles ésta foi inclusive menor, del 5,95 por cientu tres la realización de 5.677 pruebes PCR. El martes medrara hasta'l 7,28 por cientu.

Un total de 23 persones finaron nes 24 hores d'ayeri: doce homes de 95, 91, 90, 87, 85, 85, 82, 80, 72, 60, 60 y 49 años, y once muyeres de 98, 96, 94, 93, 91, 91, 90, 87, 82, 72 y 71, de los que trece vivíen en residencies. Dende que principió l'andanciu 931 asturianes y asturianos perdieron la vida con esta enfermedá, yá que los datos oficiales sumen otres dos muertes non contabilizaes de díes anteriores.

Otra manera, hai hospitalizaes 753 pacientes con confirmación o sospecha de COVID-19, a los qu'hai que 144 persones que tán na UCI. Son 47 y 1 menos que'l martes, de manera respeutiva.

66 biltos activos

Asturies informó al Ministeriu de Sanidá de la esistencia de 66 biltos activos, 30 menos qu'hai una selmana, que sumen un total de 1.175 casos. 12 d'ellos detectáronse estos 7 díes últimos, comunica Salú.