Salú comunica 122 casos, con una tasa de positividá del 5,90 por cientu

Hebo que llamentar 17 muertes, 9 homes y 8 muyeres, esti miércoles cola enfermedá causada pol coronavirus SARS-CoV-2.

A falta de conocer los datos oficiales de la COVID-19, la Conseyería de Salú comunicó la detección de 122 casos nuevos ayeri. Son 18 más que'l día anterior, cuando la tasa de positividá foi del 5,75 por cientu.

Con 3.305 pruebes PCR feches na xornada, ésta queda agora nun 5,90 por cientu. La Organización Mundial de la Salú (OMS) afita'l 5 por cientu como la llende pa tener la pandemia baxo control.

Ayeri perdieron la vida cola COVID-19 17 persones: 9 homes de 97, 93, 92, 89, 80, 68, 65, 57 y 57 años, y 8 muyeres de 97, 96, 95, 90, 90, 88, 86 y 81, de los que 9 teníen la so residencia en centros de mayores. Dende l'entamu del andanciu acumúlense 1.152 muertes.

Hai hospitalizaos 575 pacientes con confirmación o sospecha de tar afeutaos pol coronavirus, a los qu'hai que sumar otros 123 que tán na UCI. Son 13 y 6 menos que'l martes, de manera respeutiva.