Salú adelanta finalmente la comunicación de los datos de la pandemia de COVID-19 a los llunes

La selmana pasada rexistráronse 118 contaxos, una media de 17 diarios, y nun hebo finaos.

La Conseyería de Salú, que dende la selmana pasada comunica los datos de la COVID-19 de manera selmanal dau l'ameyoramientu de la situación, va dalos finalmente los llunes en llugar del miércoles, xornada que nun primer momentu anunció. En concreto va agrupar los correspondientes a los 7 díes anteriores, de llunes a domingu.

Na actualización última, pendiente entá d'espublizase, informa de 118 casos nuevos, 29 más que l'anterior, cuando comunicó 89. Supón una media de 17 casos diarios, polos 13 de selmana previa.

La evolución d'esti datu dende l'entamu de la cuarta fola foi la siguiente: 51, 57, 196, 448, 493, 423, 289, 194, 133, 77, 60, 42, 20, 12, 13, 11 y 13, hasta los 17 actuales.

Un hospitalizáu más

Na medianueche había 33 pacientes hospitalizaos con confirmación o sospecha de COVID-19, de los que 26 tán en planta, 1 más que'l domingu pasáu, y 7 na UCI. La tasa de positividá a 7 díes yera enantes de l'actualización del 1,01 por cientu –ayeri xubió al 1,26 por cientu–.

La bona noticia ye l'ausencia de muertes esta selmana, lo que permite acumular 8 díes ensin finaos.

El conseyeru de Salú, Pablo Ignacio Fernández Muñiz, participó esta mañana n'Uviéu na inauguración del Centro de Simulación Clínica SimulaC, na sede de Transinsa.