Saltadera saluda al branu con cuatro novedaes editoriales

|
'Invisible', d'Aique Fernandi, con ilustración de Juan Hernaz

Gonzalo G. Barreñada, Francisco Priegue y Paquita Suárez Coalla tán acabantes d’asoleyar títulos con Saltadera, qu’edita tamién la novela ‘Invisible’ d’Aique Fernandi, ganadora del XI Premiu María Xosefa Canellada de lliteratura infantil y xuvenil. Cuatro llectures n’asturianu pa disfrutar xunto cola llegada del bon tiempu.

‘El peso de la lluz’ ye’l llibru que firma Barreñada. Trátase del so segundu poemariu, nel que “hai un movimientu continuu que camina de dientro a fuera. Muévese dende l’espaciu íntimu de la casa (la cocina onde llee y trabaya, la llavadora, la despensa, el tendal...) a llugares abiertos pelos que rolda como un modernu poeta-flâneur: lo urbano y lo rural, el monte y les escombreres, l’estranxeru...”, apunten dende Saltadera.

El I Premiu de Poesía Antón de Marirreguera, ‘Chemtrails surden na mio boca’, tamién sal a la lluz esti xunu. Obra de Priegue, axunta 30 poemes –más otru que se forma al axuntar los primeros versos de cada poema, nel índiz del llibru– con un ciertu bagaxe surrealista a los que tresllada la imaxe de los chemtrails, les esteles que se ven nel cielu al lliberase sustancies químiques o biolóxiques que, según teoríes conspiratives, s’empleguen pa controlar el clima o la salú de la población.

Suárez Coalla, pela so parte, trainos una novela destinada al públicu xuvenil. Trátase de ‘Paecen esguiles’, la historia d’una neña de New York que pasa’l branu en pueblu n’Asturies “descubriendo –y descubriéndonos– un mundu a la midida de los sos güeyos: la  hermana mayor y la prima pequeña, les amigues, la familia, los vecinos, l’alcalde y los animales son los protagonistes d’esti mosaicu d’escenes cotidianes. De fondu, la pasión pola tierra y el pesu de les decisiones que van dar calce a una vida”.

Ilustraciones de Juan Hernaz

Completen estes cuatro novedaes de Saltadera ‘Invisible’, la obra de Lluis Aique Iglesias Fernandi gallardonada l’añu pasáu col María Xosefa Canellada dientro de los Premios Lliterarios qu’entrega la Conseyería d’Educación y Cultura, que vien ilustrada por Juan Hernaz. “Un rapaz, Enol, que ve lo invisible y tarrez el mieu nos güeyos de los otros. Un home, Xosepe, qu’anda la llinia ente la vida y la muerte, invisible pa tola xente o cásique. Los dos afuxen d’un mundu gris y ensin xacíu que los demás llamen realidá. Nel encruz d’estes dos vides nacen esperances y reviven enfotos olvidaos, pero tamién resuciten monstruos del pasáu”, espliquen dende la editorial.

Contador Estadistiques