Sal la convocatoria pa certificar los niveles B2 y C1 de llingua asturiana

La Conseyería d’Educación abre’l llunes prósimu el plazu de solicitúes. L’esamen va ser nel mes de setiembre.

Les pruebes que convoca la Conseyería d’Educación, sirven p’acreitar la competencia comunicativa en llingua asturiana y tán adaptaes a les pautes del Marcu Común Européu de Referencia, que marca les equivalencies ente l’enseñu y los esámenes d’idiomes. El nivel B2 correspuende a un nivel intermediu, y el C1 a un nivel avanzáu. Y ye comparable a los mesmos niveles qu’usa la Escuela Oficial d’Idiomes pa otres llingües como’l francés, l’inglés o l’alemán, anque l’asturianu nun s’oferte nestos centros.

Cada prueba va almitir 300 aspirantes. Si hai más solicitúes, les places van axudicase por orde alfabéticu, partiendo del primer apellíu qu’entame por ‘ZL’ hasta la lletra ‘A’, en sentíu inversu del alfabetu, como resultáu d’un sortéu públicu. Ha de presentase una única solicitú por persona, y namás va poder escoyese ún de los dos niveles ufiertaos.

La inscripción va poder facese ente’l 21 de marzu y el 8 d’abril, nel IES Aramo (Uviéu), l’IES Calderón de la Barca (Xixón), l’IES Carreño Miranda (Avilés) y l’IES Bernaldo de Quirós (Mieres del Camín). Nestos centros y na web d’Educastur ye onde va publicase la llista provisional el 26 d’abril. Pa’l 6 de mayu yá va tar la llista pa poder facer el pagu hasta’l 20 de mayu. Y el 10 de xunu va publicase la llista definitiva de les persones que puen presentase a la prueba, que va ser na primera quincena setiembre.

L’esamen va componese de les partes que siguen: comprensión de testos escritos, compresión de testos orales, producción y coproducción de testos escritos, producción y coproducción de testos orales y mediación. Tola información puede consultase dafechu nel númberu 53 del BOPA con fecha de güei y na páxina sede.asturias.es, introduciendo’l códigu de ficha de serviciu "CERT0055T01" nel buscador.