Sal alantre una moción na Xunta pa promocionar y conservar les races autóctones

La proposición de Foro pide tamién que se promocionen nos centros educativos, que cambie’l baremu de los daños causaos pol llobu y más investigación nel Serida.

El secretariu xeneral y voceru parlamentariu de FORO Asturies na Xunta Xeneral, Adrián Pumares, amosó’l so preste pol respaldu unánime del Parlamentu a la Moción sobre política en materia de ganadería pa impulsar la promoción y la conservación de les races autóctones asturianes. Pumares, pidió al Conseyeru de Mediu Rural y Cohesión Territorial, “más diálogu col sector” y “qu'atienda a les sos reclamaciones envede d'entrar en polémiques estériles que nun beneficien a naide”. Y propunxo una serie de midíes pa potenciar la promoción de les races autóctones, impulsando campañes pa espublizar los sos productos agroalimentarios, favoreciendo'l so usu na industria agroalimentaria y na gastronomía rexonal, sofitando a les distintes asociaciones y contribuyendo a la so divulgación.

Na propuesta inclúise a la vaca asturiana de los valles anque nun “tea en peligru d'estinción” porque “les races autóctones nun son ayenes a la sobreprotección del llobu al traviés de la so inclusión nel LESPRE” y alvirtió que "vamos siguir reclamando que'l Gobiernu d'España pare les sos agresiones al mundu rural y dexe de sobreprotexer innecesariamente al llobu”, amás de “siguir reclamando, non yá'l cumplimientu del Plan de Xestión del llobu” sinón midíes “decidíes que mengüen los ataques de fauna selvaxe”.

Otres de les propuestes que recueye la moción son incluir estos productos na marca Alimentos del Paraísu pa promocionar los nuestros productos gastronómicos, campañes de divulgación nes escueles y institutos pa dar a conocer los animales autóctonos, mayor compromisu per parte del Serida con estes races en collaboración coles asociaciones de criadores, y atender a les reclamaciones de la Federación de Races Autóctones Asturianes (Fedrastur) pa cambiar el baremu de daños causaos pola fauna xabaz.