Sal alantre la propuesta d'incumplimientu sobre'l Plan de Dignificación

La Comisión d'Educación y Cultura de la Xunta Xeneral aprobóla colos votos de Podemos, IX y Foro, y l'astención del PP y Ciudadanos.

La proposición non de llei aprobada n'ochobre del 2015 instaba al Gobiernu “a aprobar, enantes del final del periodu de sesiones próximu, un plan de dignificación y normalización de la llingua asturiana, que contenga un conxuntu d’aiciones urxentes col oxetivu d’algamar la so dignificación sociollingüística, la so proteición y el so puxu, con suficiente dotación presupuestaria pa cumplir tolos oxetivos, y nel que s’especifique la entidá responsable de la so execución, la previsión del costu de caúna de les aiciones, la so temporalización y los criterios pa la so evaluación”. La inaición del Executivu motivó que la diputada Concha Masa solicitara en delles ocasiones información sobre'l mesmu y finalmente, que se llevara a incumplimientos, votándose ayeri y aprobándose cola oposición única de la FSA.

El socialista foi ún de los cuatro grupos que presentaren una enmienda 'transaccional' a la proposición non de llei sobre la ellaboración d'un plan de dignificación de la llingua asturiana pal so alderique nel Plenu del 16 d'ochobre del 2015. Ésti aprobaríase nuna votación na que Ciudadanos s'astuvo y na que'l PP se posicionó en contra.