Sal a la cai’l númberu 9 de la revista de lliteratura moza ‘Formientu’

Xareos! Xestión Cultural ta acabante d’espublizar un númberu nuevu de la revista ‘Formientu’, el novenu. Ésta va ser la oportunidá cabera de lleer nella a dalgunos de los so collaboradores, col oxetivu de dar pasu a xente más mozo.
 
“La renovación xeneracional ye imprescindible nuna publicación d’estes característiques, pues ye la so esencia mesma la que cuerre peligru si nun tamos atentos a l’anovación de los autores”, señalen los responsables de la revista, qu’anuncien qu’a partir del númberu 10 namái van espublizar testos d’autores ñacíos a partir del 1980, tarazando asina cinco años la edá máxima permitida. Esti númberu, amás de por ser el caberu pa dellos collaboradores habituales, ye tamién importante por incorporar per primer vegada una estaya de crítica.
 
Los llectores van atopar nesti númberu poemes de Pablo Rodríguez Medina, Xurde Fernández, Ricardo Candás y Héctor Pérez Iglesias, amás de testos narrativos d’Abel Martínez, Jorge Fernández García, Pablo A. Quiroga Prendes, Rubén Rey Menéndez y Inacio Rodríguez-Solar. Iván Cuevas y José Ángel Gayol van facer una crítica de los llibros ‘Les últimes pallabres’ y ‘Pequeñu álbum de familia’, de manera respeutiva. ‘Formientu’, que cumplió 5 años apocayá, ta dirixida por Inaciu Galán y el so conseyu de redaición ta formáu pol escritor Benxa Pérez y el direutor, coordinaos pola escritora y filóloga Laura Marcos.