El sábadu comiencen les actividaes de la XXXVII Selmana de les Lletres Asturianes

35 eventos n'once conceyos conformen el programa entamáu pol Gobiernu pa celebrar la XXXVII Selmana de les Lletres Asturianes. L'actividá va principiar esti sábadu nel Muséu de Belles Artes y va tener la xornada principal el vienres 6, Día de les Lletres Asturianes.

Nesta ocasión la Selmana nun ta dedicada a nengún autor nin temática concreta como n'ediciones anteriores. Sicasí presenta un progama más ampliu qu'otros años, col que'l Gobiernu pretende homenaxar a la lliteratura y la música n’asturianu y en gallego-asturiano, asina como "reivindicar el valor y l’apreciu a les ferramientes comunicatives que faen posible eses producciones culturales y que son patrimoniu únicu d’Asturies".

La primer actividá va ser una visita guiada n'asturianu al Muséu de Belles Artes el sábadu al meudía, que va repetise'l siguiente anque con itinerarios diferentes; el domingu el llugar pa percorrer será'l Muséu Arqueolóxicu. Pa participar ye necesario reservar de manera previa nel teléfonu 985.10.67.41 o nel corréu electrónicu splnormalizacion@asturias.org hasta'l vienres previu. Yá de tarde, a les 19 hores, va celebrase na Casa da Cultura d'A Veiga l'Homenaxe ás Nosas Letras, que va consistir na presentación del llibru de microrrellatos conmemorativu de la Selmana de les Lletres Asturianes 'Que nun se perda nel aire', con creaciones en gallego-asturiano de 40 autores, una llectura institucional y un conciertu del grupu de rock Bacotexo.

El Gobiernu pa esta edición tamién entama actividaes xunto col Institutu Asturianu de la Muyer y Política de Mocedá, como la prevista pal llunes 2, a les 20 hores, nel Teatru Nuevu de La Felguera, col espectáculu musical 'País malva' de l’Asociación Música Tradicional Muyeres, asina como la llectura musicada de testos n’asturianu 'Muyeres y fueyes' del miércoles 4 de mayu, a les 19 hores, nel Teatru Municipal de Samartín del Rei Aurelio, en L'Entregu.

Mentes, en collaboración cola Fundación Aula de les Metáfores de Grau va facese un actu’l martes 3, a les 19.30 hores, onde se van entregar los diplomes del III Premiu de Poesía pal alumnáu d’esi conceyu, amás de presentar 'Ferralla', d’Antón García, la obra ganadora del Premiu Xuan María Acebal de Poesía.

Actu institucional na Xunta Xeneral

El miércoles 4, al meudía, va celebrase la yá tradicional llectura institucional na Xunta Xeneral. Nesta ocasión los testos van corresponder a los dos llibros conmemorativos de la Selmana, 'Que nun se pierda nel aire' na so versión n'asturianu, na que participen 60 autores, y 'Que nun se perda nel aire' na so versión en gallego-asturiano. Mentes, el xueves va abrir les sos puertes IV Feria del Llibru y Discu n’asturianu, entamada col Conceyu d'Avilés y l'Asociación de Llibreríes del Principáu d'Asturies, qu'esti añu cambiu d'ubicación pa instalase nuna carpa na plaza Domingo Álvarez Acebal.

Tamién a lo llargo de la Selmana van presentase les obres premiaes nos Premios Lliterarios qu'entama la Conseyería d'Educación y Cultura,  'Fontenebrosa III: el final', de Vicente García Oliva, Premiu María Xosefa Canellada de lliteratura infantil y xuvenil; 'Vértigu. L’atracción del abismu na sociedá contemporánea', de José Ángel Gayol, Premiu Máximo Fuertes Acevedo d’ensayu; y 'Lluvia d’agostu', de Francisco Álvarez, Premiu Xosefa Xovellanos de novela.

XXXVII Día de les Lletres Asturianes

La xornada central del homenaxe a les nueses lletres ye'l vienres, Día de les Lletres Asturianes. L'actividá va principiar al meudía col actu escolar institucional de celebración de la XXXVII Selmana de les Lletres Asturianes, que nesta ocasión va tener como sede l'IES Valle d'Ayer, en Morea, nél que van entregase los premios de XXI Certame de Creación Artística/Lliteraria, del XIII Certame de Cartelismu y del V Certame de Creación Audiovisual.

Mentes, a les 20.30, l'Academia de la Llingua Asturiana (ALLA) va celebrar nel uviedín Teatru Campoamor el so actu institucional, una xunta estraordinaria na que'l traductor y investigador Pablo Suárez García y Xosé Antón Suárez Puente, Doctor en Bioloxía y miembru destacáu del Institutu Universitariu d’Oncoloxía de la Universidá d’Uviéu van ser nomaos académicos. Enantes, a les 19.30 hores, la Xunta pola Defensa de la Llingua Asturiana entama la manifestación 'L'asturianu llingua oficial', con salida de la Estación del Norte (Renfe).

Nesta xornada tamién va celebrase'l Día del Llibru Asturiana, con un diez por cientu de descuentu na merca de llibros o discos n'asturianu en 55 establecimientos del tol país. Amás, con cada compra va entregase al veceru un exemplar de 'Que nun se pierda nel aire' o de 'Que nun se perda nel aire', según la zona.

Espectáculu musical 'Bestiariu'

Ente'l restu d'actividaes que completen la Selmana de les Lletres destaca l'espectáculu musical 'Bestiariu', basáu nel discu de mesmu nome producíu por La Fabriquina y editáu por Araz.net, empresa editora tamién d'Asturies.com. Asina, van interpretar el sábadu 7, a les 19 hores nel Teatru Vital Aza de La Pola Ḷḷena, los sos cantares del álbum los grupos FMM, Felpeyu, Los Bonsáis, Pauline en la Playa, Nacho Álvarez y el Quarteto Bendición, Guiller Momonje, Muga y el corín de Reciella, La Villana (Natalia Quintanal), Dixebra y David Varela con Pop Piquiñín.

La Selmana va zarrase'l martes 10 de mayu con teatru pal alumnáu d’Educación Secundaria nel Teatru de la Llaboral en Xixón; cola presentación en Villaviciosa de la obra ganadora del premiu Alfonso Iglesias de cómic, 'El viaxe a la lluz', de Ruma Barbero; y con un concursu pa xente mozo de microrrellatos improvisaos, de nome 'Entaína a escribir', na Sala Borrón d’Uviéu.