Sánchez-Vicente: “Nós namás tenemos idea de gobernar”

Unión Asturianista, coalición formada por PAS y URAS, presentó esti xueves a Xuan Xosé Sánchez Vicente como candidatu. Tamién adelantó dalgunos aspectos d’un proyectu que, según esponen, “aspira a ganar les elecciones”.

El presidente del PAS y candidatu d’Unión Asturianista, Xuan Xosé Sanchez Vicente, el presidente d’URAS, Javier López Alfonso, y los secretarios de dambes organizaciones, Fernando Esposito y Xesús Cañedo, presentaron al candidatu nun actu esti xueves n’Uviéu.

Sánchez Vicente, sorrayó la necesidá d’una fuerza “asturianista, asturiana y pa los asturianos” que rompa colos partíos de calter estatal centralizaos en Madrid. El dirixente asturianista señaló amás que la so formación aspira a ganar les elecciones y solucionar los problemes d’Asturies.

Programa
Nel actu, tamién fixo Sánchez Vicente dalgunes referencies al programa políticu de la formación. Rebaxar el númberu de conseyeríes y altos cargos y apoyar a los autónomos, son dalgunes de les propuestes d’Unión Asturianista.

El candidatu asturianista destacó tamién que la so coalición ye la cuarta fuerza política d’Asturies y criticó a los partíos mayoritarios que, según la so opinión, diben salir perxudicaos nestes elecciones porque los asturianos tán “desencantaos” con ellos.

“Idea de gobernar”
Per otru llau, Sánchez Vicente descartó la posibilidá de qu’Unión Asturianista pacte con Foro Asturias, el nuevu partíu que pue encabezar Francisco Álvarez-Cascos. “Nós namás tenemos idea de gobernar”, señaló nesti sen.

Sobre alcuerdos con otres fuerces asturianistes, el presidente del PAS dixo que la coalición taba abierta a tola xente que quiera sumase al so proyectu.
 

Comparte...                                    

Enllaz permanente