Rusecu va acoyer los actos conmemorativos del Día Internacional de les Muyeres Rurales

|
Belarmino Fernández, Begoña López, Alejandro Calvo, Ana Labad y Marcelino Martínez Día Muyer Rural S

Esa mesma fin de selmana va entamase'l I Mercáu de los 'Alimentos del Paraíso'.

La Conseyería de Mediu Rural y Cohesión Territorial y la Rede Asturiana de Desarrollu Rural (Reader) escoyeron Sobrescobiu p'acoyer los actos conmemorativos del Día Internacional de les Muyeres Rurales –con cartelería n'asturianu–, conceyu reconocíu como capital de los montes del Estáu del 2022 pola Asociación Española de Municipios de Montaña. Van tener llugar el sábadu 15 y el domingu 16 d'ochobre en Rusecu, cola entrega del Premiu Muyer Rural d'Asturies 2022 como eventu central.

El xuráu del gallardón va aconceyar el llunes pa escoyer a la merecedora d'esti reconocimientu ente les 29 candidatures presentaes. Isabel Álvarez Rodríguez, María Josefa Vega Suárez, Ana Inmaculada Adeba Vallina y Ana Labad Cruz lleváronlu nes cuatro primeres ediciones.

Los actos de conmemoración del Día Internacional de les Muyeres Rurales van contar cola participación de la coordinadora de la Escuela para la Igualdad y el Empoderamiento de la Mujer Rural d'Hondures, Ela López Chávez, que ofrecerá la charra 'Otras miradas, otros mundos. Somos iguales, somos rurales', y van proponer l'alderique 'Alzando la voz y sin desentonar desde el medio rural', nel que participarán artistes femenines fuertemente venceyaes al mediu rural. Tamién va proyeutase'l fime 'Pan de limón con semillas de amapola', del direutor Benito Zambrano.

30 families productores

El sábadu y el domingu Rusecu va acoyer el primer Mercáu de los 'Alimentos del Paraíso', que naz cola intención de convertise nun circuitu añal que percuerra diferentes conceyos. Les muyeres con productos adscritos a la marca de calidá van ser les protagonistes, cola fin de dar visibilidá a la so importante función nel mediu rural.

En total ta prevista la participación de más 30 families productores de carne, miel, quesu, vino, fabes, choscu y productos ecolóxicos. Amás, coincidiendo con esti mercáu, van celebrase actividaes infantiles, muestres de cocina y talleres gastronómicos, asina como actuaciones musicales y espectáculos.

Na semeya, Belarmino Fernández, presidente de Reader; María Begoña López Fernández, direutora xeneral de Desarrollu Rural y Agroalimentación; Alejandro Calvo, conseyeru de Mediu Rural y Cohesión Territorial; Labad Cruz, gallardonada col Premiu Muyer Rural d'Asturias 2021; y l'alcalde de Sobrescobiu, Marcelino Martínez Menéndez.

Contador Estadistiques