El ‘Gernika’, barcu que participa na segunda Flota de la Llibertá con destín a Gaza nel que viaxen Rafael Palacios y Miguel San Miguel, ta reteníu en Kolymbari (Creta). Güei ta convocada en Xixón una concentración en solidaridá colos cooperantes.
 
La campaña Rumbo a Gaza aseguró nun comunicáu que la prohibición de la salida de la Flota por parte de les autoridaes griegues “fraya’l Derechu comunitariu, la llexislación internacional y les propies lleis helenes” y denunciaron la “posición inmoral y cobarde” del Ministeriu d’Asuntos Esteriores del Estáu español pola so actitú de “silenciu” ante esta “anomalía evidente”. “El grupu d’activistes, pel momentu, queda nel ‘Gernika’, el barcu de Rumbo a Gaza, hasta que’l Gobiernu de Grecia llevante la orde inxustificada d’inmovilización sobre les naves de la Segunda Flota de la Llibertá”, comunicó.
 
Bloque por Asturies-Unidá Nacionalista Asturiana (UNA) tamién mostró la so indignación ante la situación na que tán les 40 persones que viaxen nel ‘Gernika’ y señaló que va sumase a la concentración de protesta convocada esta tarde na plaza del Parchís, en Xixón, a les 20 hores pola Comité de Solidaridá cola Causa Árabe. La coalición nacionalista anima a tolos asturianos a participar nesti actu ante “la situación de vulnerabilidá arbitraria del derechu de llibre circulación consagráu na llexislación internacional y violáu de forma espresa pol Gobiernu griegu, y ante’l silenciu impune del Gobiernu del Estáu español al traviés del embaxador en Grecia, Miguel Fuerte Suárez, y la ministra d’Asuntos Esteriores, Trinidad Jiménez”.
 
Por último, Bloque-UNA reclama al Gobiernu del Estáu que tome “les midíes necesaries pa revocar la orde absurda de paralización dictada poles autoridaes griegues al serviciu del Estáu d'Israel”. Mentes, el Bloque Nacionalista Gallego (BNG), que convocó concentraciones de protesta pa güei en Santiago de Compostela, A Coruña y Ourense, tien previsto presentar iniciatives nes Cortes y nel Parllamento Européu pa que’l Gobiernyu central y les autoridades de la Xunión Europea dean proteición a la Flota cola fin de garantizar el so derecho a llevar ayuda a la población palestina de Gaza.