Ruma Barbero participa nun alcuentru con llectores en Nava

L'actividá céntrase na so obra 'El viaxe a la lluz', ganadora del Alfonso Iglesias 2015.

Los alcuentros col autor de los Talleres de Llectura n’Asturianu de Nava, qu’entama’l Serviciu de Normalización Llingüística de la 'Comarca de la Sidra',  acueyen mañana, a les 19 hores, na sala Marta Portal de la Casa la Cultura de Nava a Ruma Barbero. El xixonés, amás de músicu, ye un escelente dibuxante de cómic, como amuesen los dos Premios Alfonso Iglesias algamaos de los ocho convocaos hasta la fecha: el primeru, correspondiente al 2009, con 'Manzajú', y el sétimu, el del añu pasáu, con 'El viaxe a la lluz'.

Ye precisamente ésti últimu llibru'l que protagoniza esta sesión. Construyida a partir de vivencies reales de la so familia materna en Ponga, 'El viaxe a la lluz' adiéntrase na historia de los fugaos nos duros años de la posguerra española.