Rubiera anuncia la celebración d’un Festival Atlánticu en Xixón en xunetu ensin la etiqueta 'celta'

El conceyal de Cultura, Carlos Rubiera, anunció na presentación del Xixón 5º 40' que’l Conceyu va entamar un Festival Atlánticu en xunetu. Ésti certame pretende quitase la etiqueta ‘celta’ y integrar a Cantabria, Euskadi y Portugal.
 
Amás, la intención de Rubiera ye que, nun futuru, el Festival Atlánticu de Xixón integre los conteníos de Xixón 5º 40’, eventu que cumple trés años de vida y que va ser una continuación de la Selmana Grande. Asina, ésti va principiar el martes 16 d’agostu y va allargase hasta’l domingu 21. Van ser seis díes nos que Xixón va tornar a mirar al norte pa hermanase con otres naciones celtes al traviés de la música y d’actividaes culturales.
 
La Plaza Mayor va ser l’epicentru de les celebraciones y conciertos, y Campu Valdés y delles cais de Cimavilla la sede del Mercáu Tradicional Asturianu, que va abrise’l xueves al meudía. No que respeuta al terrén musical, pal martes ta previsto un conciertu d’Héctor Braga y la so banda folk-rock, pa dar pasu a la primer actuación internacional el miércoles cola presencia de los escoceses Lau. Yá de xueves, el turnu va ser pa los irlandeses Mairtin O'Connor Band's, y de vienres pa los bretones Jacky Molard Acoustic Quartet. Tolos conciertos principien a les 22 hores.
 
L’escenariu de la plaza xixoxesa va ser sede’l sábadu, a partir de les 21.30 hores, del XI Festival Internacional de Gaites Villa de Xixón, que va completase’l domingu con un desfile nel que van tomar parte toles bandes que participen nesti eventu: Banda Gaites Villa de Xixón, Banda Gaites Infantil Villa de Xixón ‘Magüeta’, La Reina del Truébano, Banda Gaites La Seronda, Banda Gaitas Manxadoira (Galicia), Lomond & Clide Pipe Band (Alba) y Bagad Cap Caval (Breizh). Ésti va salir a les 17 hores de la ponte’l Piles y va percorrer tola playa San Llorienzu hasta Campu Valdés.
 
Pa finar el festival, ta previsto un espectáculu de clausura, a partir de les 22 hores na Plaza Mayor, nel que ta prevista la participación de mediu centenar de músicos que van facer un repás a sones de gaita de dellos lugares. Ente los collaboradores van tar Tejedor, Anxo Lorenzo, componentes del Conservatoriu Profesional de Música de Xixón, Llangres, Ismael Tomás o la orquesta Fase Cuatro, ente otros.