Rubiera: “El Festival Atlánticu ta enfocáu como’l de Lorient, anque ensin la etiqueta de celta”

Nel mes de setiembre, la Conceyalía de Cultura de Xixón, encabezada por Carlos Rubiera, va entamar a trabayar na preparación del I Festival Atlánticu de Xixón. Ésti va celebrase na segunda quincena de xunetu y va ser similar al de Lorient.
 
“El Festival Atlánticu ta enfocáu como’l de Lorient, anquen ensin la etiqueta de celta”, señala Rubiera, que prentende que nel certame xixonés tean incluyíes, amás de toles naciones del Arcu Atlánticu de raigaños celtes, “delegaciones de Portugal, Cantabria, País Vasco y pue que de Normandía, poles conexones que tien con Asturies”, afirma’l conceyal, qu’apuesta por una primer edición del Festival de carauter modestu pa dir medrando añu a añu. “Queremos que sía un intercambiu cultural y musical ente los países del Arcu Atlánticu”, destaca l’edil por Foro Asturias Ciudadano (FAC).
 
Amás, el certame, que cuenta col sofitu del Gobiernu d’Asturies, pretende ser “un escaparate futuru pal intercambiu económicu” ente estos países aprovechando les rellaciones yá establecíes y les posibilidaes qu’ufre la Autopista del Mar ente El Musel y Naunnt-Saint-Nazère. La fecha escoyida pa esta celebración ye la segunda quincena de xunetu y la idea ye que’l Festival tea repartíu per tola ciudá. Esta fecha, de repetise al igual qu’esti añu, coincidiría cola ‘Semana Negra’, anque Rubiera señala que la organización del Festival Atlánticu ta separtada dafechu a la del certame negru y que nun vien pa sustituyilu. A los que sí afeutará sería a los dos intercélticos d’Avilés, que se celebren nesi mesmu mes.
 
No que respueta al Festival Xixón 5º 40’, que vieno organizándose n’agostu tres la celebración de la Selmana Grande xixonesa, Rubiera entiende que ye una creación de la corporación anterior y que lo más lóxico ye que s’integre nel futuru Festival Atlánticu de Xixón.