Rubén Vega y Carlos Gordon presenten la biografía de Juan Muñiz Zapico

Los historiadores Rubén Vega y Carlos Gordon van presentar a les 19:00 hores d'esti miércoles, nel Aula Magna del edificiu históricu de la Universidá d'Uviéu, asitiáu na cai San Francisco, el so llibru biográficu ""Juanín, llabraor de llibertaes" sobre la figura del sindicalista Juan Muñiz Zapico, líder de Comisiones Obreres na transición que perdió la vida nun accidente de coche nel añu 1977.

La edición cuenta con una esbilla fotográfica y documentos históricos reproducíos que faen de complementu a la llinia argumental, que cuenta colos testimonios de Francisco Prado Alberdi, Nicolás Sartorius, Rafael Pillado, Vicente Álvarez Areces, Luís Felipe Capellín, Manuel García Fonseca o Pedro Alberto Marcos, persones que trataron y compartieron vida política y sindical con Muñiz Zapico.

Muñiz Zapico fuera l'únicu asturianu encausáu nel famosu "procesu 1001" que sentó, cuando la dictadura franquista yá taba dando les boquiaes, a un garapiellu de sindicalistes nel escañu de los acusaos. La dictadura pidía castigos descomanaos pa ellos, y en concreto, solicitaba 18 años de cárcele pa Muñiz Zapico, que dempués quedaron en cuatro.