Rubén Sánchez Antuña presenta la so novela “Dos estrelles nel firmamentu infinitu”

L'inxenieru de telecomunicaciones y escritor Rubén Sánchez Antuña (Sotrondio 1973) espubliza cola casa VTP la so primer novela "dos estrelles nel firmamentu infinitu" que se presenta esti martes 14 de febreru a les 8 de la tarde na Casa de Cultura de La Pola Siero.

Conocíu polos sos escritos divulgativos sobre'l mundu de les telecomunicaciones y internet, Rubén Sánchez Antuña ye collaborador de distintos medios de comunicación, ente ellos "El Mundo" o Asturies.com. Agora, esti autor sorpriende cola apaición d'esti primer trabayu narrativu centráu na rellación de dos amigos. Ún d'ellos cura y l'otru inxenieru en paru, malcontentos cola so situación personal y cola diferencia ente les espectatives que teníen creaes al entamar les sos carreres profesionales y la realidá probetaya que-yos toca vivir. La so afición por intereses comunes como la lliteratura y les nueves tecnoloxíes val de filu conductor pa que, dende l'escenariu d'un pueblu asturianu, los protagonistes falen de los temes más variaos.