RTPA y ALLA, principales apuestes en política llingüística pa la prósima llexislatura

|
Academia de la Llingua Asturiana (ALLA)

Nello coinciden los programes eleutorales de la FSA, Podemos ya IX

Namás PSOE, Podemos ya IX incluín midíes de política llingüística nos sos programes eleutorales. L'apueste por una mayor presencia del asturianu na Radiotelevisión del Principáu d'Asturies y por garantizar el futuru de l'Academia de la Llingua Asturiana son les úniques coincidencies ente les tres formaciones. No que cinca a los medios de comunicación públicos, la FSA apuesta por "fomentar l'usu" de manera "especial". Pola so parte, Podemos quier que tanto "asturianu como gallego-asturianu" tengan una presencia "troncal" na RTPA y que, amás, heba informativos na llingua propia. Izquierda Xunida comprométese a que los conteníos n'asturianu vaigan "n'horarios de másima audiencia", qu'aporten a públicos más mozos y que seyan más variaos, apostando en concretu polos "deportivos y los informativos".

En cuantes a lo que quieren los partíos pa l'ALLA, el PSOE comprométese a "sofitar el so trabayu." Podemos, sicasí, ye más concretu y apuesta por "equiparar l'estatus xurídicu y financieru a los del restu les instituciones llingüístiques del Estáu." Na mesma llínia va la propuesta d'IX pa la másima institución llingüística del país al plantiar "l'afitamientu xurídicu-alministrativu de l'Academia de la Llingua Asturiana pa garantizar el plenu desenvolvimientu de les sos funciones."

A partir d'ehí, cada partíu amiesta otres cuestiones. Namás Podemos ya IX fain propuestes pal ámbitu educativu. Podemos quier el "reconocimientu de la especialidá docente de Llingua Asturiana en Primaria y Secundaria." Izquierda Xunida, pola so parte, apuesta por "afalar l'asignatura de Llingua Asturiana tanto en Primaria como na Educación Secundaria Obligatoria." Asinamesmu, propón "desendolcar l'usu del asturianu como llingua vehicular na enseñanza a tolos niveles.". Finalmente, namás el PSOE fai referencia a la cuestión toponímica, al comprometese espresamente a "rematar l'afitamientu de topónimos tradicionales" respetando, según alvierten, "la voluntá de los conceyos"

Contador Estadistiques