RPA emite una programación especial por mor de la Selmana de les Lletres Asturianes

Goxe Producciones tien preparaes quince pieces de diez minutos en llingua asturiana pa emitir na RPA dende’l llunes hasta’l vienres de la selmana qu’entra. Reportaxes, entrevistes y tola información sobre la programación de la XXXVI Selmana de les Lletres Asturianes conformen los conteníos.

Un equipu compuestu polos periodistes y ex redautores d’Asturies.com, Xicu Ariza y Damián Barreiro, la llocutora Mely Fernández, el téunicu Xuan Xosé Mariño, el músicu Sergio Rodríguez y el productor Xune Elipe encargóse de trabayar estes pieces coles que se pretende dar un mayor protagonismu a la XXXVI Selmana de les Lletres Asturianes na radio pública del país, asina como amosar al públicu el valir del asturianu como llingua de comunicación. Cinco de los espacios programaos tienen dedíquense a ufiertar l’axenda diaria d’actos entamaos per toda Asturies alredor d’esta celebración, completándolos con una recomendación lliteraria y una entrevista especial con profesionales d’ámbitos estremaos que falen n’asturianu del so llabor y esperiencies, ente ellos l’actriz María Cotiello, el deportista Fernando González o’l cocineru Lluis Nel Estrada.

Mentes, los diez restantes van consisitir en reportaxe sobre dellos temes, como los 40 años de Conceyu Bable, la historia de la llingua asturiana, la so situación na enseñanza, la creación lliteraria, la normalización social, la tresmisión xeneracional, la reivindicación llingüística, la música asturiana, el gallego-asturianu o los premios lliterarios del Gobiernu d’Asturies. Pa ello, Goxe Producciones cuenta cola participación de persones venceyaes cola temática a tratar, como ye’l casu de Xosé Lluis García Arias, Xuan Xosé Sánchez Vicente, Lluis Xabel Álvarez, Ana María Cano, Xulio Viejo, Penélope Miranda, Ramón d’Andrés, David Guardado, Iris Díaz Trancho, Pablo Xuan Manzano, Antón García, Esther Prieto, Ignaciu Llope, Ismael Arias, Nacho Fonseca o Yolanda Huergo, ente otros. La emisión d’estes pieces va facese en dellos horarios depués de los informativos, repitiéndose mientres la selmana, con difusión tamién peles redes sociales.