RPA emite pieces esta Selmana de les Lletres que conmemoren el centenariu del cancioneru de Torner

Al traviés de 25 miniespacios la RPA ta dando a conocer esta Selmana de les Lletres Asturianes los aspeutos más importantes del ‘Cancionero Musical de la Lírica Popular Asturiana’, la obra d’Eduardo Martínez Torner que cumple 100 años, asina como de la vida del uvieín. La información complétase con versiones d’estos temes por Llan de Cubel, Carlos Rubiera, Avalanch o Corquiéu.

El ‘Cancionero Musical de la Lírica Popular Asturiana’, espublizáu nel 1920, “trátase d'un trabayu enorme que diba tener una importancia pergrande na musicoloxía europea. Ente les pieces que pueden alcontrase nél hai dances, cantares de trabayu, de boda, pal baille, de ronda, fandangos o añaes; toes elles recoyíes de la tradición musical asturiana”, esplica Goxe Producciones, empresa encargada de la ellaboración d’estos espacios radiofónicos.

Con guión y escoyeta musical de Xune Elipe, les 25 pieces van dir emitiéndose a la lo llargo de la Selmana de les Lletres, de llunes a vienres, depués de los boletinos informativos de les 11, 13, 16, 17 y 18 hores. Éstes dan a conocer aspeutos de les circunstancies vitales y del trabayu investigador de Torner, amás de tratar fondamente'l conteníu y la repercusión d'un volume como'l so cancioneru.

Los trabayos complétense con versiones de dellos cantares conteníos nél feches por bandes y solistes como Carlos Rubiera, Víctor Manuel, Anabel Santiago, Diamantina Rodríguez, Avalanch, Corquiéu, Llan de Cubel, Felpeyu, Mus, Nuberu, Hevia, Isaac Turienzo, Los Cuatro Ases o Madreselva, ente otros munchos.