Rosario y Paraná protagonizaron los actos de celebración del ‘Día de les Lletres Asturianes nel Esterior’

Los Centros Asturianos de Rosario y Paraná acoyeron los actos del ‘Día de les Lletres Asturianes nel Esterior’ del 2011 esta fin de selmana pasada. María José Ramos, conseyera de Presidencia, viaxó a Arxentina pa participar nestes xornaes.

El ‘Día de les Lletres Asturianes nel Esterior’ ye un eventu organizáu pol Conseyu de Comunidaes Asturianes en collaboración cola Conseyería de Cultura y Turismu, y de l’Academia de la Llingua Asturiana, que nació nel 2001 col oxetivu d’averar la llingua y la cultura asturiana a los emigrantes. Nesti tiempu la celebración fixóse en dellos centros asturianos del Estáu, Europa o América, tornando esti añu a Arxentina tres un primer pasu per Buenos Aires nel 2005.
 
Les ciudaes de Rosario y Paraná vivieron delles actividaes ente les que destacaron una conferencia de Fernando de la Puente Hevia sobre’l ‘Mapa del folclore asturianu’ y otra de Héctor Braga que trató sobre ‘Les lletres nel folclore musical asturianu’. Tamién prestó enforma a los asistentes al ‘Día de les Lletres Asturianes nel Esterior’ un recital de poemes n’asturianu, con acompañamientu musical de Flavio Rodríguez Benito a la gaita, nel que participaron autoridaes, presidentes de los centros y socios. Asina, Ramos lleó ‘Una casa’, de Berta Piñán, y el presidente del Conseyu de Comunidaes Asturianes, Manuel de la Cera, fixo lo propio con ‘Paniceiros’, de Xuan Bello.
 
Otra iniciativa prestosa foi la puesta en marcha d’un cursu ‘on-line’ d’asturianu que tien el nome ‘Falar y más falar’ y que va permitir a los asturianos nel esterior a daprender l’idioma dende les sos cases o centros asturianos nel momento del día que prefieran. El cursu tien una duración de 60 hores llectives, dividíes en ocho selmanes, y pueden inscribise nél tolos emigrantes que lo deseen nel corréu falarymasfalar@gmail.com. El plazu pa matriculase termina’l 6 de mayu y los requisitos únicos pa meyorar los conocimientos d’asturianu ye disponer d’un ordenador con accesu a Internet y una cuenta de corréu electrónicu pa realizar les tutoríes y unviar y recibir materiales.