Rosa Fernández va intentalo otra vegada al Broad Peak

Nel 2009 quixo llegar a la cume ensin ésitu.

La montañera asturiana anunció'l so viaxe próximu a Pakistán p'afrontar esti retu nuevu. El Broad Peak, nome que recibe esti picu y que nun ye aceptáu pol pueblu balti, cuenta con un altor de 8.051 metros, polo que ye ún de los catorce ochomiles del planeta.

"La decisión ta tomada. Tres contemplar hasta'l momentu últimu la posibilidá de regresar al K2 y de pasar les selmanes últimes faciendo funambulismu ente lo posible y lo imposible, con un güeyu puestu no loxístico y otro no financiero, decidí enfrentame al Broad Peak", apuntó na so páxina web. Rosa Fernández yá intentó la so ascensión, ensin ésitu, nel 2009, cuando "taba recién diagnosticada de cáncer de mama y el mio corazón, la mio mente, el mio cuerpu y los mios médicos llegaron al alcuerdu de que tres la radioterapia y enantes de la quimioterapia había les selmanes suficientes pa volver a sentime dueña del mio destín y facer lo qu'amo y sé: escalar montes".

La mala suerte impidio-y facelo nel Broad Peak, polo qu'entama otra vuelta esta aventura, na que la de Cangas del Narcea va tar acompañada de Javier Campos, "un multiaventureru cámara d'altura con esperiencia ochomilista" que tuvo tamién nel Polu Norte y que cubrió una travesía ivernal pel Himalaya.