Rosa Díez dexa cayer qu’habrá alcuerdu de cara a la investidura

“Yo creo que va haber un alcuerdu porque a naide interésa-y inestabilidá y repetición d'eleiciones”, afirmó en Madrid Rosa Díez. La llíder d’UPyD nun aclarió a cuál de los dos bloque va apoyar el diputáu que sacó la so formación n’Asturies.
 
Díez fixo estes declaraciones nuna entrevista n’Antena 3 y remarcó que, en too casu, la responsabilidá de lo que pueda asoceder n’Asturies ha de midise nos sos xustos términos. "Nós somos ún de 45 diputaos", señaló. D’igual forma, recordó que la so formación política va llegar a un alcuerdu con aquel candidatu que s'avere más a les propuestes p'Asturies que fixo públiques UPyD. "Nós presentamos el documentu; son el restu de partíos los que tienen que contestar lo que piensen del mesmu", indicó.
 
Ente los pidimientos de la organización centralista ta la devolución al Estáu de competencies como la Sanidá y la Educación, la investigación parllamentaria de la ‘Operación Marea’, l'establecimientu d'una circunscripción eleutoral única n'Asturies y la fusión de municipios. L’empate téunicu ente la derecha y la izquierda nel país convierte al diputáu d’UPyD, Ignacio Prendes, en llave de gobiernu.