Roque, alcalde d'El Valle Altu de Peñamellera, coordina la Comisión de Cultura y Política Llingüística de la FACC

Turismu pasa a tener área propia, del que pasa a ser responsable José Manuel González Castro, primer edil de Cangues d'Onís.

La Comisión Executiva de la Federación Asturiana de Conceyos (FACC) celebró ayeri'l primer aconceyamientu depués de la renovación de los sos órganos de gobiernu. Na mesma aprobáronse les diferentes comisiones de trabayu que conformen la estructura de la entidá pa la llexislatura conceyil 2023-2027, un total de 18, como nel periodu anterior, y asignó a los sos respeutivos coordinadores.

José Antonio Roque, alcalde d'El Valle Altu de Peñamellera por Foro, va encargase de la de Cultura y Política Llingüística en sustitución de Sandra Cuesta, ex primer edil de Colunga. Turismu, que pertenecía a esti mesmu área de trabayu, ta agora de manera independiente baxo coordinación del popular González Castro.

Cada vicepresidencia (5) y vocalía (13) ye responsable d'una comisión. Pa la presidenta de la FACC, Cecilia Pérez Sánchez, alcaldesa d'El Franco, "esta estructura busca cubrir aquelles árees que previsiblemente van marcar l'actividá municipal na llexislatura presente".

El restu de comisiones son Alministración Llocal (Carlos Valle, Cuideiru); Asuntos Europeos y Xusticia (Pedro Fernández García, Tapia); Cambio Climáticu (Sergio Hidalgo Alonso, Salas); Ciencia, Formación y Emplegu (Oscar Pérez Suárez, Valdés); Derechos Ciudadanos y Axenda 2030 (Salomé Samartino, Caravia); Derechos Sociales y Bienestar (Rosana González Fernández, Cuaña); Educación (Juan Carlos Iglesias García, Ayer); Facienda (Juan Cañal, Nava), Igualdá y Emigración (Marta Alonso, Ponga); Industria, Comerciu y Desarrollu Económicu (Jorge Suárez García, Gozón); Infraestructuraes y Movilidá (Ángel García González 'Cepi', Siero), Inmigración y Cooperación al Desarrollu (Amparo Antuña, Noreña), Mediu Rural (Gemma Álvarez Delgado, Ḷḷena); Ordenación del Territoriu y Vivienda (Roberto García Rodríguez, Llangréu), Retu Demográficu (Alberto Tirador, Illas); y Salú (Marcelino Martínez Menéndez, Sobrescobiu). Caúna d'elles va tar integrada por seis cargos eleutos llocales, incluyida la coordinación.