Rodrigo Rato, nuevu director del FMI

El Fondu Monetariu Internacional ta acabante d'escoyer nuevu director xerente na persona del ex ministru d'Economía Rodrigo Rato, quien va ocupar el sitiu que dexó llibre l'alemán Horst Kohler, que dexo'l cargu pa poder presentase a les presidenciales alemanes. El políticu asturianu entama agora un mandatu de cinco años al que llega tres d'una decisión por consensu de los venticuatro directores del organismu.

La candidatura de Rato sintióse siempre pa esti cargu, pero foi dempués de la renuncia del candidatu francés Jean Lemierre que quedó claro que'l puestu diba ser pa elli, anque'l FMI tuvo qu'escoyer formalmente ente la candidatura europea del ex ministru español y la candidatura africana de Mohamed El Erian. De toles formes y pa siguir la tradición nel organismu, el cargu dióse-y otra vegada más a un européu en virtú al alcuerdu ente Estaos Xuníos y los países europeos pa repartise'l poder de los dos principales organismos multillaterales, como son el Bancu Mundial y el FMI. Por esti alcuerdu y al marxe de lo que pueda dicir el restu del mundu'l director del Bancu Mundial ye siempre norteamericanu mentanto que'l del FMI ye européu.

Con esti nomamientu Rodrigo Rato ye'l primer español en algamar esti prestixosu puestu. Xunta'l sofitu d'Estaos Xuníos, los países europeos y llatinoamericanos tamién influyeron muncho les xestiones que ficieron l'ex presidente del Gobiernu José María Aznar y el presidente d'anguaño José Luís Rodríguez Zapatero. Ente los retos del nuevu director xerente del FMI s'atopen la negociación de la deuda con Arxentina y Brasil nun nuevu marcu internacional onde'l terrorismu islámicu tamién va ser importante. Rodrigo Rato ya dio anuncia de qu'un de los sos oxetivos va ser el d'evitar crisis financieres internacionales y ayudar nel desarrollu económicu de los países más probes.

Rodrigo Rato Figaredo, d'orixe asturianu, tien anguaño 55 años y ye llicenciáu en Derechu, doctor n'Economía y Master en Dirección d'empreses. La so trayectoria política entamó nel 1979, llegando bien pronto a ser miembru de la directiva d'Alianza Popular. Diputáu por Madrid, secretariu alxuntu del Partíu Popular y, dende 1996, Ministru d'Economía y Vicepresidente del Gobiernu d'Aznar. El trunfu na carrera política de Rato concueyó siempre col éxitu empresarial, y ye que Rato foi hasta agora'l diputáu del Congresu con más patrimoniu particular gracies a los sos negocios familiares. Ente los puestos de responsabilidá dientro del patrimoniu empresarial de la familia Rato qu'ocupa'l nuevu director del FMI rescamplen los de directivu y conseyeru d'Aguas de Fuensanta, Pinos Jaime Sierra, Edificaciones Padilla y Construcciones Riesgo.

Dempués del fracasu intentu de suceder a Aznar, l'ex ministru va disfrutar en Washington de tolos privilexos de ser el númberu ún del FMI: 400.000 dólares llibres d'impuestos al añu, sueldu vitaliciu, rangu de xefe d'estáu con inmunidá diplomática, llibre disposición pa nomar a dos conseyeros asesores tamién con sueldos bien curiosos…Ensin duldes un gran premiu énte los malos tiempos pelos que cuerre'l Partíu Popular. Hai quien yá diz que'l prestixu nel cargu podría llevar a Rato a dirixir el contraataque del PP nes próximes elecciones.