Rodrigo Cuevas abre seis díes de conciertos y actividaes en Xixón pol Festival Arcu Atlánticu

|
Cartelu VII Festival Arcu Atlánticu

‘Mocedá creativo nel Arcu Atlánticu’ ye la temática que protagoniza'l VII Festival Arcu Atlánticu, que comienza'l martes y que va allargase hasta’l domingu. Rodrigo Cuevas abre los conciertos de la Plaza Mayor, per onde tamién van pasar Tanxugueiras o Marisa Valle Roso, amás de les actuaciones programaes n'otros espacios.

‘El mundo por montera’, l’espectáculu col que ta xirando Cuevas per tol Estáu, va poder vese otra vuelta en Xixón depués de que s’estrenase en marzu del añu pasáu na Llaboral. L’actuación comienza a les 22 hores, pero enantes, a les 20.30 hores nel patiu de Centru de Cultura Antiguu Institutu, va inaugurase oficialmente l’Arcu Atlánticu con un espectáculu multidisciplinar protagonizáu pola mocedá creativo del país.

Precisamente mientres esta edición del certame col que Xixón torna a mirar hacia’l mar, van poder conocese iniciatives emprendedores y proyeutos de desarrollu “col envís d'aumentar l'intercambiu d'esperiencies y l'establecimientu de víes nueves de comunicación ente entidaes, mocedá y coleutivos”. El llibru y la edición, el diseñu gráficu y la comunicación, la música, las teunoloxíes nueves, el diseñu, la moda y la imaxe son los temes que, ente otros, va tocar una programación na que les actuaciones en direuto son el so atractivu principal.

Asina, el públicu xixonés y visitante van poder disfrutar nel escenariu asitiáu na Plaza Mayor –espaciu que pierde’l toldu nel que destacaba’l logu de la ciudá col topónimu asturianu xunto cola pallabra ‘branu’ pa asitiar otru con ‘Gijón suena bien’– del gallegu Cristian Silva (mañana), de la xira ‘Consciente’ de Marisa Valle Roso (xueves), de les tamién gallegues Tanxugueiras (vienres), de los castellanos Fetén Fetén (sábadu) y del espectáculu ‘Raigaños’ de la Banda de Música de Xixón (domingu). Nun va ser l’únicu espaciu pa la música, ya que nel Antiguu Institutu y en dellos puntos de Cimavilla van actuar bandes d’altu nivel de dientro y fuera d’Astuires como La Bonturné, D’Urria, Brez, Aira da Pedra, Ún de Grao o los escoceses Dallahan, que debuten nel país, ente oros munchos.

Cursín d’asturianu

Ente les munches actividaes programaes pa estos seis díes destaca l’entamu, depués de la bona esperiencia del añu pasáu, d’un cursín d’asturianu que va ponese ente mañana y el sábadu con clases a les 19 hores na Casa’l Chinu, pa lo que ye necesario inscribise na direición de corréu electrónicu @arcoatlantico.gijon.es. Les persones que participen van recibir nociones básiques y vocabulariu, con conteníos venceyaos a la temática d’esta edición del Arcu Atlánticu.

Contador Estadistiques