Rodríguez Alonso recueye’l vienres el primer premiu del XVII Concursu de Cuentos pola Oficialidá del Asturianu

El Conceyu de Bimenes entrega esti vienres los premios del XVII Concursu de Cuentos pola Oficialidá del Asturianu. El ganador d’esta edición ye’l xixonés Pablo Rodríguez Alonso, que presentó un rellatu de nome ‘L’invitáu’.

 

El xuráu compuestu polos escritores Xulio Vixil, Héctor Pérez Iglesias y Isabel Gutiérrez Novo, amás de pol alcalde de Bimenes, Alejandro Canteli, y el téunicu responsable de la Estaya de Cultura, Daniel Cueli, que fixeren les funciones de presidente y secretariu respeutivamente, escoyeron como merecedor del premiu esti testu del ex redautor d’Asturies.com, que sucede a Gutiérrez Novo nel palmarés del gallardón. El segundu puestu foi pa la llangreana Elisabet Felgueroso, con ‘El foriatu’, y el terceru pal periodista xixonés Francisco Álvarez, por ‘Una nueche en La Belle Alliance’. La recompensa por estos gallardones ye de 600, 450 y 300 euros.

 

La sala de conceyos del Ayuntamientu de Bimenes va acoyer el vienres, a partir de les 18 hores, l’actu d’entrega de premios. Nél, Rodríguez Alonso va facer una llectura pública del cuentu ganador.

 

Solís va apregonar la Fiesta de la Oficialidá

 

La fin de selmana siguiente va celebrase nel conceyu yerbatu la Fiesta de la Oficialidá de la Llingua Asturiana, que yá suma dieciocho ediciones. Ésta va principiar el sábadu 5 al meudía na plaza de la Casa Conceyu con una intervención institucional y la llectura del pregón, que nesta ocasión va protagonizar l’escritor y dibuxante Miguel Solís. L’avilesín ye miembru correspondiente de l’Academia de la Llingua Asturiana y l’autor de ‘Les llamuergues doraes’, la primera novela contemporánea en llingua asturiana.

 

Pese a les dificultaes económiques, l’Ayuntamientu de Bimenes nun dulda caltener esta folixa reivindicativa que recuerda la declaración d’oficialidá nel conceyu –torgada llueu pol Tribunal Constitucional– nel Plenu del 5 de xunetu del 1997. Nel programa festivu d’esti añu destaca la celebración del I Concursu d’Escanciadores de Bimenes, puntuable pal Campeonatu d’Asturies d’Echadores de Sidra. Ésti va tener llugar el mesmu sábadu a les 17.30 hores nel polideportivu del Colexu Públicu de Martimporra, tres la xinta popular. El domingu l'actividá va centrase nel XV Concursu de Gaita de Bimenes.