Rodríguez Alonso: “Nun primer momentu, Voluntad posicionóse del llau del exe”

L’historiador Pablo Rodríguez Alonso presentó nel Centru Municipal Integráu d’El Llano la so obra ‘De totalitarios a «demócrates»’. Nella fai un repasu al discursu ellaboráu nel diariu xixonés Voluntad na primer etapa del franquismu.
 
En concreto, Rodríguez Alonso céntrase nos conteníos d’esti periódicu llocal “órganu d’espresión oficial del partíu únicu (FE-JONS), hermanu xixonés de La Nueva España (Uviéu) y fíu d’Arriba” nel periodu que va del 1938 a 1946, según esplica l’autor d’esta obra que tien el nome completu de ‘De totalitarios a «demócrates». Franquismu, fascismu y nazismu na II Guerra Mundial al traviés del diariu xixonés Voluntad’. La intención del historiador xixonés ye facer un análisis de los conteníos apecíos nel periódicu centrándose na editorial y columnes d’opinión, “pero teniendo en cuenta lo global”. “Nun ye namái recopilar lo que se dixo, sinón esplicar por qué se dixo”, añadió.
 
Según esplica l’historiador, Voluntad yera “una voz ortodoxa del franquismu”. Dicía lo que quería dicir el rexime nesi mesmu momentu, lo que lleva a Rodríguez Alonso a estudiar la evolución d’esi mensaxe según se desarrollen los acontencimientos de la Segunda Guerra Mundial. D’esta forma, divide’l so trabayu en cuatro partes: la rellación del franquismu con otros réximes totalitarios, una descripción del nacimientu del falanxismu n’Asturies, un análisis de los acontecimientos previos de la Segunda Guerra Mundial y una esplicación del discursu de Voluntad y la so evolución.
 
Nesi sen, Rodríguez Alonso asegura que “nun primer momentu, Voluntad posiciónase del llau del exe”, una postura que foi reforzándose nos tres primeros años hasta que, nel 1943, les potencies aliaes principien a ganar la guerra. Ye nesi momentu cuando les páxines del periódicu xixonés dexa pa prau les crítiques a les democracies lliberales hasta’l puntu de llegar a tratar el conflictu bélicu “como una llucha ente la civilización y el comunismu y non ente’l fascismu y la democracia”. Na época última d’estudiu, sobre’l 1945, el franquismu entama a eloxar les virtúes de la so democracia orgánica y a mirar hacia los Estaos Xuníos y Reinu Xuníu.
 
Nel actu de presentación d’esti trabayu ganador del XII Premiu d’investigación histórica Rosario de Acuña, l’historiador xixonés tuvo acompañáu d’otros dos historiadores: Faustino Zapico, profesor de Xeografía y Historia del IES Bernaldo de Quirós (Mieres), y Macrino Fernández, de Zahorí Ediciones. Na so intervención, Zapico destacó la obra por ser “interesante y especialmente oportuna polo que ta pasando nos medios de comunicación dende hai unos díes”, en referencia clara a la polémica pol Diccionario Biográfico Español editáu pola Real Academia de la Historia. “Ye un intentu de canonización del franquismu y dalgún qu’otru personaxe; un procesu de blanqueamientu de la so figura”, señaló.
 
Al respeuto, Zapico considera sorprendente “negar el calter totalitariu del franquismu cuando’l propiu franquismu dicía que yera totalitariu”. Mentes, Rodríguez Alonso, que tamién trató d’esti tema na so intervención, calificó’l Diccionario como “un panfletu filofascista no que se refier al sieglu XX” y llamentó que “toos paguemos colos nuesos impuestos los desvaríos de xente como Luis Suárez o Gonzalo Anes mientres hai investigadores mozos en situación precaria”.
 
No que se refier al llibru, el profesor mierense destacó que “ye una obra importante en sí mesma por lo bien fecha que ta, lo bien escrita y el trabayu de dedicación llaboriosa que tien detrás”. Amás, considera que ye un llibru valiosu “pa la divulgación histórica en llingua asturiana y pa sacar a l’asturianu del guetu nel que ta”. “Hai que llevar l’asturianu al nuesu ámbitu de trabayu”, animó Zapico a los presentes.
 
Mentes, Fernández, que fixo’l llabor de presentador, señaló que’l trabayu de Rodríguez Alonso ye’l primeru de los 15 que tien espublizaos Zahorí Ediciones n’asturianu y anunció “que nun va ser l’únicu”, yá qu’hai en marcha un proyeutu na nuesa llingua que va asoleyar esta editorial.