Rockmería despide l’añu con un repasu cultural al 2010

Rockmería, l’espaciu radiofónicu de la RPA dirixíu por Xune Elipe, emite esti xueves l’últimu programa del añu. Nél, los músicos Miguel Fernandi y Xicu Ariza faen un repasu de música y otres manifestaciones culturales mientres el 2010.

Los meyores discos del añu, lo más destacáu del folk y el rock o conciertos recomendables, son dalgunes de les coses sobre les que xirará la edición de Rockmería d’esti xueves 30 d’avientu.

Nesti últimu programa del añu, colaboren xunto a Xune Elipe el cantante de Skama la Rede, Miguel Fernandi, y el guitarrista de Falanoncaduca, Xicu Ariza. Componentes de dos bandes enmarcaes dientro del rock n’ast qu’asoleyaron discu esti 2010.

Otres manifestaciones culturales
Amás de la música, el programa tamién va falar d’otros aspectos rellacionaos cola producción cultural asturiana, como les referencies lliteraries más destacaes o’l cómic. El programa va emitise na RPA esti xueves 30 a les doce la nueche.