Roblóse'l presupuestu d'Asturies pal 2006

El Conseyu de Gobiernu d'Asturies aprobó ayeri el proyectu de presupuestos autonómicos pal añu 2.006. A 3.609 millones d'euros llega un presupuestu que supón una xuba del 8,2% respective al del 2005. Ello ye que, al reves del añu pasáu, esti presupuestu nun supunxo mayor roce ente los socios de gobiernu, y ello ye que'l presupuestu xeneral d'Asturies pal 2005 acuta'l 65% pa gastos sociales, incluyendo 15,4 millones d'euros pa la partida que-y correspuende al salariu social.

La radiotelevisión autonómica va tener un presupuestu superior al del salariu y incluso penriba de lo que se contaba de mano, conseñándose pa ella 17 millones d'euros, dos millones más de los que se contaba a cuenta mayormente de cargues impositives .

Per conseyeríes, educación y salú lleven ente elles cerca de la metada del presupuestu global, cosa que s'esplica en cuantes que son les que más personal tienen venceyáu, pero xuben toes, rescamplando'l casu de cultura, que va tener un 52% más de presupuestu que nel 2005. Xusticia y Asuntos Esteriores xube un 20% y Vivienda un 15%, mientres que les que menos xuba van tener van ser Mediu Ambiente y Infraestructures (4,4%), Salú (+5,4%) y Educación (6,06%)


El "céntimu sanitariu" o recargu sobre les gasolines que se paga n'Asturies dende xineru del 2004, y que les patronales del trsporte consiguieron que retirare'l Gobiernu central, pon una dulda nel futuru de la economía asturiana, y ello ye que les cuentes nun-y cuadren al Gobiernu asturianu en casu de retirase'l tributu, que recarga con 0,024 euros el preciu del llitru de gasolina y 0,02 euros el de gasoil, polo que dende Uviéu cuenten con que Madrid apaute daqué midida compensatoria pa nun perder la recaudación por esti conceptu en casu de vese obligaos a dexar de cobrar el recargu.