Roblen un 'Manifiestu pola cocina asturiana' que reclama "caltener los términos asturianos"

El documentu compónse d'una reflexón sobre Asturies, 12 principios gastronómicos y un decálogu d'encamientos hosteleros.

Un grupu de cocineros y divulgadores gastronómicos tán acabantes d'asoleyar un 'Manifiestu pola cocina asturiana' que propón "un activismu pa defender la cultura gastronómica d'Asturies". El testu, firmáu por Borja Alcázar, David Montes, David Castañón, David Remartínez, José Antonio Campoviejo y Nacho Manzano, recueye una esbilla de principios alredor de los qu'esperen axuntar a la mayor parte de trabayadores del mundu de l'alimentación, que pueden roblalu nesta páxina web.

"L'alimentación ye un circuitu económicu, pero tamién históricu, social y identitariu, con implicaciones fundamentales na calidá de vida de los nuesos vecinos y vecines, y por supuestu, nel futuru de la nuesa tierra", rescamplen nel manifiestu, qu'amás d'esta reflexón inclúi una docena de principios gastronómicos y un decálogu d'encamientos pa los hosteleros del país. Ente los primeros faen referencia a la defensa d'un movimientu caltenible, el respetu de les tradiciones culturales, una nutrición saludable con alimentos de proximidá, l'apertura d'un alderique políticu pa la redaición d'una llei que dexe a los pequeños productos vender direutamente a restoranes y tiendes, o la proteición de los nuesos productos, platos y especies autóctones, ente otros aspeutos importantes.

Esplicaciones al veceru sobre'l productu

No que respeuta al decálogu, entama faciendo referencia a la sidra, encamentando a especificar en carta "les marques y tipos de sidra disponible, les sos característiques, llagares y zones xeográfiques. D'esta forma, la cultura sidrera va recibir una atención y una reconocencia qu'anguañu nun esfruta".

La procedencia de los productos, esplicaciones al veceru por parte del camareru o xefe de sala, l'apertura de les cartes y menús a platos de la cocina tradicional asturiana "más allá de la consabida fabada, el cachopu y l'arroz con lleche", el tratu prioritariu a los quesos procurando dar visibilidá a les queseríes pequeñes son dalgunos de los puntos del decálogu. Ésti tamién pon el focu nel usu del asturianu: "Les cartes o menús van caltener los términos asturianos pa los productos, esplicando'l so equivalente en castellán al veceru cuando sía necesariu. D'esa forma, la dimensión cultural de la gastronomía respétase y amplía".

"Los llocales que cocinen con productu asturianu, y que nun utilicen productos y preparaciones de quinta gama, van recibir un distintivu especial col espíritu del eslogan 'Equí cocínase asturianu'", apunta'l novenu, mentes que l'últimu afita que "los cocineros asturianos que soscriban esti manifiestu van collaborar na meyora, vixilancia y ampliación d'estes idees, normes y suxerencies, con cuenta de contribuyir al caltenimientu y evolución de la rica gastronomía asturiana".