Róblase un protocolu d’actuación sobre’l Sidrón que “pon en valor la riqueza del xacimientu”

|
Víctor Velasco, Patricia Ferrero, Genaro Alonso y Santiago García Granda firma protocolu del Sidrón

El Gobiernu, el Conceyu de Piloña, el Conseyu Superior d’Investigaciones Científiques (CSIC) y la Universidáu d’Uviéu roblaron esti llunes un protocolu d’actuación pa la proteición, investigación y difusión de la cueva del Sidrón. De cuatro años de vixencia, “pon en valor la riqueza y l’ayalga que significa’l xacimientu”, afirma’l conseyeru Genaro Alonso.

Aprobáu pol Conseyu de Gobiernu’l 20 de febreru, esta mañana aconceyaron nel edificio de la Obra Pía, en L’Infiestu, el responsable d’Educación y Cultura, el rector Santiago García Granda, la teniente d’alcalde Patricia Ferrero y el vicepresidente d’Organización y Relaciones Institucionales del CSIC, Víctor Velasco pa formalizar l’alcuerdu. El documentu robláu plantega la creación d’una comisión de siguimientu, que va tar integrada pol arqueólogu César García Castro, en representación de la conseyería; el biólogu y paleoantropólogu Antonio Rosas, por parte del CSIC; el prehistoriador y arqueólogu Marco de la Rasilla, pola Universidá d’Uviéu; y l’alcalde Iván Allende.

El protocolu afita como oxetivos fundamentales la proteición y conservación de la cueva y el so entornu, asina como la continuidá de les investigaciones científiques al rodiu un xacimientu que ye una referencia internacional nel estudiu paleontolóxicu sobre los neandertales, amás de la promoción d’actividaes docentes y l’impulsu d’eventos y alcuentros científicos que faciliten el conocimientu y la relevancia de los trabayos fechos nel Sidrón. L’alcuerdu inclúi l’entamu d’aiciones de cultura científica, col oxetu de difundir los conocimientos alquiríos y los resultaos de les investigaciones relatives al xacimientu.

Amás, promueve iniciatives de turismu cultural y ociu pa la promoción de Piloña, qu’han de contar col asesoramientu de los investigadores de la Universidá d’Uviéu y del CSIC. “Nun ye un conveniu porque nun tien compromisos xurídicos concretos, sinón un protocolu xeneral d’actuación, que ye lo que pretendemos”, esto ye, “fines comunes d’actuación y oxetivos compartíos”, lo que nun esclúi “posibles convenios que se puedan establecer ente les partes”, esplicó Alonso.

“Contribúi a poner en valor la riqueza y l’ayalga que significa’l xacimientu del Sidrón y posibilita investigaciones nueves y víes nueves de promoción del xacimientu y del conceyu de Piloña”, añadió’l conseyeru. “Ye un impulsu más a la relevancia nacional y internacional que tien” el Sidrón “y la so contribución inmensa al conocimientu de los nuesos antepasaos, l’homo neanderthalensis”.

Dos décades de descubrimientos

El protocolu parte de los conocimientos algamaos mientres les dos décades últimes d’investigación del xacimientu, la coleición más completa de restos humanos neandertales de la Península Ibérica. Los investigadores de la Universidá d’Uviéu y el CSIC, cola collaboración del Gobiernu, sacaron a la lluz una amuesa de fósiles estraordinara que permitió aiciones tan relevantes como la carauterización anatómica de les poblaciones neandertales del sur d’Europa y los primeros estudios de fitoxeografía d’esta especie.

Na semeya, Velasco, Ferrero, Alonso y García Granda.

Contador Estadistiques