Roberto Holgado: “UNA-Bloque de Carreño va tener más marxe de maniobra nesta llexislatura”

Pese a perder 46 votos, UNA-Bloque consiguió mantener el so conceyal en Carreño. Roberto Holgado, secretariu d’organización d’UNA, considera que la situación nueva nel conceyu tres el 22-M va dar “más marxe de maniobra” a la so formación.
 
“Conseguimos mantener un representante de la izquierda asturianista na Casa Conceyu de Carreño, lo que ye mui positivo, pese a que los resultaos nun foron escelentes”, apunta Holgado. El conceyal nuevu d’Unidá Nacionalista Asturiana (UNA)-Bloque por Asturies, de 37 años, valora que nestes eleiciones el númberu de candidatures foi mayor y qu’ocho d’elles algamaron representación, lo que complica un poco más l’atrayer l’atención el votante.
 
Esta tarde, UNA-Bloque de Carreño tien previsto aconceyase p’analizar los resultaos eleutorales y establecer una estratexa de cara los pautos posibles que puedan dase nes feches próximes. Nesta llexislatura ye imposible la reedición del pautu ente PSOE y IX-LV, que contaba col sofitu d’Unión URAS-PAS a la hora de votar los presupuestos, y l’abanicu d’opciones ye ampliu. El PP, segunda fuercia más votada, anunció ayeri la so intención de pautar con FAC y tres de les cinco formaciones con un conceyal pa tratar d’arrebata-y l’alcaldía al ‘socialista’ Ángel Riego, oxetivu que los populares van tener mui difícil.
 
Ochos formaciones tienen representación na Casa Conceyu nesta llexislatura: PSOE (6 conceyales), PP (4), FAC (2), IX-LV (1), Unión Independiente de Carreño (1), Carreño Unido (1), UNA-Bloque (1) y el PCPE (1). “Nun vamos tener problemes en mantener conversaciones con dellos grupos, pero nun nos plantegamos apoyar al PP”, esplica Holgado, que considera lo más normal siguir na oposición, “onde vamos tener más marxe de maniobra nesta llexislatura” por unos resultaos que faen difícil la gobernabilidá.
 
En pallabres del conceyal, los oxetivos d’UNA-Bloque nesta llexislatura son el “facer frente a los problemes medioambientales del conceyu, avanzar hacia una democracia participativa y facer más llabor de cai”. Asina, la llucha contra la incineradora, la subestación llétrica, l’alta tensión o les consecuencies del superpuertu van ser primordiales nestos cuatro años próximos pa la formación nacionalista.
 
Otra manera, no que respeuta a los resultaos nacionales de la coalición, Holgado prefirió nun facer valoraciones hasta que nun aconceyase colos sos compañeros, anque reconoció que “nun respondieron a les espectatives que teníemos puestes”. Sicasí, mostróse optimista pal futuru y destacó que la so formación “tuvo’l meyor resultáu de la izquierda nacionaliega y que 500 persones dieron el pasu pa integrase na candidatura, lo que ye mui importante”.