Ripa y González Suárez, candidatos definitivos a la secretaría xeneral de Podemos Asturies

Somos Asturies, con Daniel Ripa, y Asturies Sí Puede, con María José González Suárez, son les dos corrientes qu’aspiren a algamar la secretaría xeneral de Podemos Asturies. Dambos grupos presentaron tamién los sos candidatos al Conseyu Ciudadanu, nel qu’apaecen nomes destacaos nel asturianismu como Xune Elipe o Paco Álvarez, nel casu de los primeros, y Daniel Fernández Blanco, nel de los segundos, ente otros.

Ayeri fixéronse públicos los nomes de les dos candidatures dientro del procesu de configuración de Podemos Asturies. Les dos cares principales tanto de Somos Asturies como de Asturies Sí Puede yá yeren conocíes, yá que dambes corrientes anunciaren a Ripa y a González Suárez, de manera respeutiva. como les persones propuestes pa les primaries a la secretaría xeneral. Quedaba, entós, por saber  quiénes configuraríen de manera definitva les llistes al Conseyu Ciudadanu por parte de les dos propuestes.

Nel casu de Somos Asturies, que se presentó pela mañana nel Centru de Cultura Antiguu Institutu de Xixón, destaquen nomes como los del cantante de Dixebra, Xune Elipe; el periodista y editor Paco Álvarez; el maestru cofundador de Xunta Moza, Lluis Miguel Orviz; l’escritor José Ángel Gayol; la editora Silvia Cosio; y el maestru Nacio González. Completen la llista Andrés Ron, Fini López, Manuel Carrero, María Hernández, Fernando de Dios Moreno, Laura Tuero, José Fernando Díaz, Lorena Gil, Pelayo García, Cristina Blanco, Nora Isabel Espina, Lucía Montejo, Néstor Fernández, David González, Noelia Martínez, Orlando Fernández, Emilio León, Paula Valero, Kike López, Inés González, Pablo M. Testa, Mar García, Jara Cosculluela, Elena Herrera, Beatriz González, Antón Díaz y Rosa María Espiño. Esta corriente cuenta col sofitu de Compromisu por Asturies, según reafirmó’l 12 de xineru la organización nun comunicáu.

Pela so parte, ente los candidatos al Conseyu Ciudadanu d’Asturies Sí Puede –que realizó l’actu de presentación al mesmu tiempo nel barriu xixonés de Cimavilla– ta l’ex voceru nacional de Compromisu por Asturies, Daniel Fernández Blanco, y el so hermanu Tino, qu’ocupara’l cargu de secretariu de Comunicación na plataforma de partíos; y l’autónomu que participa nel Movimientu Asturianu Corvera (MAS Corvera), Xosé Xicu Mata. El restu de persones de la llista son Carlos Rodríguez Álvarez, Begoña Blanco, José Manuel del Estal, Pablo Martínez Corral, Laura Vélez, Celestino Sánchez Préstamo, Manuel Ángel Pérez García, Mariola Fernández Garrido, Francisco Javier García Álvarez, María Belén Álvarez Bilbao, Marisa Vallejo, María Teresa Fernández Álvarez, Santiago Obaya, Marisa Martínez González, Esther Lorente, Esmeralda Palacio, Vicente Turrado, Vanesa Llaneza, Julia García Arribas, María Edelmira Pérez Álvarez, Rosa María Tristán, Andrés García López, Montserrat Pravia, Miguel Ángel Somoano, Rodrigo Barros, Ignacio Antequera, Laura Alarcón y Francisco Rodríguez Gómez.

Les feches del procesu

Tres la xornada de güei, destinada a la revisión d’irregularidaes posibles, va abrise mañana la campaña eleutoral d’estes primaries, que va allargase hasta’l 8 de febreru. Les votaciones celebraránse del 9 al 13 y los resultaos conoceránse’l 14. Hai que recordar que, amás de los propuestos poles dos corrientes mayoritaries, hai dellos independientes que tamién aspiren a ocupar cargu nel Conseyu Ciudadanu.