Ripa defende nel Conseyu Ciudadanu Estatal de Podemos la “vía asturiana” d’aición política pa enfocar el 2018

Encarar los problemes de la xente al traviés de soluciones concretes. Asina define Daniel Ripa, secretariu xeneral de Podemos Asturies, la “vía asturiana”, que defendió’l sábadu nel primer Conseyu Ciudadanu Estatal nel que participa tres la so reeleición.

La postura de defensa de la Sanidá, el tratamientu de la crisis demográfica o la gratuidá de les escueles de 0 a 3 años, cuestión ésta última qu’impidió un alcuerdu cola FSA pa sacar alantre los presupuestos del 2018, son los exemplos que punxo Ripa a les sos compañeres y compañeros sobre la política desendolcada por Podemos Asturies d’aportar soluciones concretes a les problemátiques qu’atopa la xente. Un mou d’actuar que fixo llamar “vía asturiana” y que considera más afayadiza pa poner en práutica por Podemos a nivel estatal mientres esti añu “tres el ciclu político del 2017 y les eleiciones catalanes”.

“Ye obscenu y indigno qu’haya más de 100.000 persones asturianes esperando hasta dos años por atención sanitaria, por eso plantegamos que les llistes d’espera se reduzan a 90 días. Asinamesmo, defendemos una escuela de 0 a 3 pública, universal y gratuita”, apuntó Ripa, qu’añadió que “cuesta entender qu’a un Partido Socialista que falaba de cambiu y de la llegada d’un ciclu políticu nuevu con Pedro Sánchez –amás de pautar pronto col Partido Popular a nivel estatal– n’Asturies resultó-y más fácil pautar una fiscalidá col Partido Popular de Cherines qu’aprobar xunto a Podemos una propuesta tan cenciella y de sentíu común como la escuela de 0 a 3 años”. “Munches respuestes d’hacia ónde ha de dir Podemos yá les tenemos nes aiciones que Podemos Asturies ta desendolcando a nivel autonómicu”, destacó al tiempu que recordó l’apoyu que tuvo la so candidatura nes primaries, un 85 por cientu cola mayor participación de tolos procesos internos del partíu a nivel estatal, como garantía del sofitu de la militancia a l’agora nomada “vía asturiana”.

“Avala una forma d’enfocar el proyeutu de Podemos Asturies, qu’entiende qu’hai que mantener una firmeza tresversal na llucha contra la corrupción, devolver a la sociedá parte de les perres que reciben los sos cargos públicos al traviés de donaciones a proyeutos sociales, impulsando’l cambio dende yá mesmo, asina como apostar pol municipalismu y construyir candidatures municipalistes na mayoría de los conceyos asturianos, afianzándose como una voz propia y non subordinada frente al Partido Socialista y el Partido Popular, con una alternativa de gobiernu propia”, rellató.